لە گوندی گرێزەی سەیدسادق چی ڕوویدا و چۆن خێزانێک کۆمەڵکوژ کران؟
وێنەی سێ لەو ئەندامانەی کوژراون..
وێستگەنیوز_
درەنگانی شەوی 19 لەسەر 20ـی 3ـی 2025، لە گوندی گرێزەی سەیدسادق کەسێک دایک و باوک و دوو خوشک و برایەکی خۆی کوشت.
بەگوێرەی زانیارییەکان، ڕووداوەکە نزیک کاتژمێر 12:00ـی شەوی ڕابردوو، بەهۆی کێشەیەکی کۆمەڵایەتی و دەمەقاڵەی نێوان ئەندامانی خێزانەکەوە بووە و گەنجەکە بە کڵاشینکۆف دەستڕێژی لە باوکی و دایکی دوو خوشکی و برایەکی کردووە و سەرجەمیانی کوشتووە، دواتریش کۆتایی بە ژیانی خۆی هێناوە و باس لەوە دەکرێت، ئەو گەنجەی ئەندامانی خێزانەکەی کۆمەڵکوژ کردووە، چەند ساڵێک لە دەرەوەی وڵات و لە بەریتانیا ژیاوە و چەند ڕۆژێکە بەسەردان گەڕاوەتەوە.
دوای ڕووداوەکە، تەرمەکان گواستراونەتەوە نەخۆشخانەی گشتیی سەیدسادق و لەوێشەوە براونەتە پەیمانگەی پزیشکی دادی سلێمانی، دوای توێکاری، تەرمەکان ڕەوانەی گوندی گرێزە کراونەتەوە.
سەرۆکی خێزانەکە، کە ناوی سالار محەممەدە تەمەنی 50 ساڵە و بەهۆی ئەوەی فەرمانبەری فەرمانگەی کارەبا بووە بە 'سالاری کارەبا' ناسراو بووە، هەروەها چەند ڕۆژێک لەمەوبەر لە یەکێک لە نەخۆشخانەکانی شاری سلێمانی نەشتەرگەری دڵی بۆ کراوە.
هەتا ئێستا پۆلیس و لایەنە پەیوەندیدارەکان هیچ زانیاریی و ڕاگەیەندراوێکیان سەبارەت بە ڕووداوەکە بڵاو نەکردووەتەوە و تەنیا ئەوەی هەیە زانیاریی خزم و کەسە نزیکەکانی ئەو خێزانەیە، گوایە کێشەکە لەسەر دابەشکردنی موڵک و میراتی بووە و بەرەبەیانی ئەمڕۆ لە گۆڕستانی گوندی گرێزە تەرمی هەر شەش ئەندامانی خێزانەکە لە تەنیشت یەک بەخاک سپێردران.
ناوی کوژراوەکان:
سالار محەممەد 50 ساڵ – سەرۆکی خێزان
نیهایەت قادر – هاوژینی سالار و دایکی منداڵەکان
سەهەند سالار 14 ساڵ
یارا سالار 8 ساڵان
سیما سالار
ناوی ئەو کوڕەی "ئەندامانی خێزانەی کوشتووە":
بەشیر سالار 22 ساڵ دانیشتووی بەریتانیا
AM:08:36:20/03/2025
ئه‌م بابه‌ته 5220
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت