بارانبارینی شەوی رابردوو زیان بە گوندەکانی ناحیەی سەنگەسەر دەگەیەنێت

‌

وێستگەنیوز_ ئەمیر حەسەن

بەهۆی بارانبارینی شەوی ڕابردوو زیانێکی زۆری ماددی بەر گوندەکانی مەنگوڕایەتی لە سنووری ناحیەی سەنگەسەر کەوتوون.

بەپێی زانیارییەکانی ئەمیر حەسەن پەیامنێری وێستگەنیوز، بارانبارینی شەوی رابردوو زیانێکی زۆری بە گوندەکانی مەنگوڕایەتی گەیاندووە. پێشبینیش دەکرێت، "بڕی زیانەکانی بگەنە زیاتر لە 300 هەزار دۆلار (30 دەفتەر دۆلار)".

ئاماژەی بەوەشکرد، بارانبارینەکەی شەوی رابردوو، حەوزێکی بەخێوکردنی ماسی، بەشێکی زۆری کەپرە گەشتیارییەکانی ناوچەکە، پێنچ پرد، گەڵابەیەک و عادیلەیەکی شارەوانی بناری قەندیلی بردووە.

گوندەکانی بناری مەنگورایەتی لە نۆ گوند پێکهاتووە. سەرجەم گوندەکان گوندنشینانی تێدا دەژین و بە کاری ئاژەڵداری و باخداری و گەشتیارییەوە خەریکن. هەروەها لە گوندی 'گردئێستر'ـی سەر بە ناحیەی ژاراوە، زیانێکی زۆر بە ئەو جووتیارانە کەوتووە کە برنجیان کردووە.

PM:03:07:02/10/2024