رۆیتەرز: تەرمى حەسەن نەسروڵا لە شوێنى بۆردوومانەکەى بەیروت دۆزرایەوە

وێستگه‌نیوزـ

ئاژانسى رۆیتەرز رایگەیاند، تەرمى حەسەن نەسروڵا، ئەمینداری گشتیى حزبوڵاى لوبنان لە شوێنى بۆردوومانەکەى بەیروت دۆزرایەوە.

ئاژانسەکە لە زاری سەرچاوەیەکی پزیشکی و سەرچاوەیەکی دیکەی ئەمنییه‌وه‌ بڵاویكرده‌وه‌، لاشەکە هیچ برینێکی راستەوخۆی پێوە دیار نییە و وادیارە هۆکاری مردنەکە بەهۆی زەبری بەهێزی تەقینەوەی مووشەکەکانی ئیسرائیلەوە بێت.

ئێوارەی رۆژی هەیینی ئیسرائیل هێرشێکی ئاسمانی کردەسەر چەند باڵەخانەیەک لە باشووری بەیروتی پایتەختی لوبنان و بۆ رۆژی دواتر رایگەیاند، حەسەن نەسروڵا، سکرتێری گشتی حزبوڵایان بەئامانجگرتووە و لە هێرشەکەدا لەگەڵ چەند سەرکردەیەکی دیکەدا کوژراوە. دوای چەند کاتژمێرێک حزبوڵا کوژرانی سەرکردەکەیانی پشتڕاستکردەوە.

کوژرانی حەسەن نەسروڵا، کاردانەوەیەکی گەورەی لێکەوتەوە و بنیامین نەتانیاهۆ، سەرۆکوەزیرانی ئیسرائیل رایگەیاند، راستەوخۆ فەرمانی هێرشەکەی کردووە و پەیامێکیشی بۆ ئێران نارد و وتی: "هیچ جێگەیەک نییە لە ئێران و رۆژهەڵاتی ناوەڕاست دەستی ئێمەی پێنەگات".

لەبارەی کوژرانی سەرکردە لوبنانییەکە، جۆ بایدن، سەرۆکی ئەمریکا رایگەیاند، ئاگاداری ئۆپراسیۆنەکەی ئیسرائیل نەبوون، بەڵام رێکارێکی "دادپەروەرانە" بووە و بەتەواوی "پشتگیری لە ئیسرائیل دەکەین بۆ بەرگریکردن لە خۆی".

هاوکات ئەمڕۆ عەباس عەراقچی، وەزیری دەرەوەی ئێران، رایگەیاند واشنتن هاوبەشی ئیسرائیلە لە کوشتنی حەسەن نەسروڵا و کوژرانی سەرکردەکەی حزبوڵا بێ وەڵام تێناپەڕێت.

PM:02:48:29/09/2024

ئه‌م بابه‌ته 1500 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت