سه‌رچاوه‌یه‌ك كاتی ناردنی ته‌واوكاری مووچه‌ی ئابی مووچه‌خۆرانی هه‌رێم راده‌گه‌یه‌نێت
وێستگه‌نیوز-
سه‌رچاوه‌یه‌ك رایگه‌یاند كه بڕیاره له ماوه‌ی دوو رۆژی داھاتوودا حكومه‌تی عێراق ته‌واوكاری مووچه‌ی مانگی ئابی مووچه‌خۆران بۆ ھه‌رێم بنێرێت، وه‌زاره‌تی دارایی ھه‌رێمیش رایگه‌یاندووه كه له‌گه‌ڵ پڕكردنه‌وه‌ی كورتھێنانی مووچه‌ی مانگی ئاب لیستی مووچه راده‌گه‌یه‌نن.
ماڵپه‌ڕی " به‌غداد ئه‌لیوم" له زاری سه‌رچاوه‌یه‌كه‌وه كه ناوه‌كه‌ی ئاشكرا نه‌كردووه، ده‌ڵێت: "وه‌زاره‌تی دارایی فیدراڵ، حكومه‌تی هه‌رێمی ئاگادار كردووه‌ته‌وه كه له ماوه‌ی دوو رۆژدا مووچه‌ی مانگی ئاب به‌ته‌واوی ده‌نێرێت، هه‌ربۆیه هیچ كێشه‌یه‌كی ته‌كنیكی رێگری له ناردنی پاره‌كه ناكات".
ئه‌و سه‌رچاوه‌یه ئاماژه‌ی به‌وه‌كردووه كه "به‌غدا بڕی 570 ملیار دیناری وه‌ك به‌شێك له مووچه‌ی مانگی ئاب بۆ ھه‌رێم ناردووه، ئه‌وه‌ی ماوه‌ته‌وه مووچه‌ی هێزه ئه‌منییه‌كانه كه نزیكه‌ی 430 ملیار دیناره".
ئه‌وه‌ش له‌كاتێكدایه، ھونه‌ر جه‌مال وته‌بێژی وه‌زاره‌تی دارایی ھه‌رێم رایگه‌یاندووه، بۆ دابه‌شكردنی مووچه‌ی مانگی ئاب بڕی 998 ملیار دیناریان پێویسته و له‌ئێستادا 755 ملیار دیناریان له‌به‌رده‌سته، به‌وپێیه بڕی 243 ملیار دینار كورتھێنان ھه‌یه، بۆ ئه‌و مه‌به‌سته‌ش له‌گه‌ڵ وه‌زاره‌تی دارایی فیدراڵ له‌سه‌ر ھێڵن و له‌گه‌ڵ پڕكردنه‌وه‌ی ئه‌و كورتھێنانه لیستی مووچه‌ی مانگی ئاب راده‌گه‌یه‌نن.
PM:08:37:23/09/2024
ئه‌م بابه‌ته 16876
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت