بافڵ تاڵەبانی: پێویستە کۆتایی بە تاکڕەوی لە بەڕێوەبردندا بهێنرێت
دیمه‌نێك له كۆبوونه‌وه‌كه
وێستگه‌نیوزـ
بافڵ تاڵەبانی، سەرۆکی یەکێتیی نیشتمانی کوردستان لە دەباشان پێشوازیی لە ئەندرۆ بیزلی، کونسوڵی گشتیی بەریتانیا لە هەرێمی کوردستان کرد و رایگه‌یاند، پێویستە کۆتایی بە جیاکاری لە پێشکەشکردنی خزمەتگوزاری و تاکڕەوی لە بەڕێوەبردندا بهێنرێت.
به‌پێی راگه‌یه‌ندراوی كۆبوونه‌وه‌كه، لەدیدارەکەدا گەشەپێدانی پەیوەندییەکان و فراوانکردنی هەماهەنگییەکانی نێوان هەردوولا لە چوارچێوەی پاراستنی بەرژەوەندییە باڵاکان جەختیلێکرایەوە.
باس له‌وه‌شكراوه، لەدرێژەی دیدارەکەدا دۆخی گشتیی هەرێمی کوردستان تاوتوێکرا بافڵ تاڵەبانی، سیاسەت و ستراتیژی یەکێتی بۆ کۆی پرسەکان خستەڕوو و ئاماژەی بەوەکرد، "ئێمە بە بیرکردنەوەیەکی نیشتمانییانە و لەبەرچاوگرتنی پێداویستییەکانی دۆخەکە هەنگاودەنێین".
بافڵ تاڵه‌بانی وتیشی: "ئامانجمان هێنانە کایەی حوکمڕانییەکی دادپەروەر و خزمەتگوزارە کە تیایدا هاووڵاتییان مافەکانیان پارێزراوبێت، ئەمەش خواستی هەموولایەکە و پێویستە کۆتایی بە جیاکاری لە پێشکەشکردنی خزمەتگوزاری و تاکڕەوی لە بەڕێوەبردندا بهێنرێت".
"چارەسەرکردنی کێشەکانی نێوان هەولێر و بەغدا و هەوڵەکان بۆ گەیشتن بە ئەنجامێکی ئەرێنی، تەوەرێکیتری دیدارەکە بوو و هەردوولا هاوڕابوون دەستوور و هاوبەشیی راستەقینە بنەمای چارەسەرکردنی کێشەکان بن و مافی هەموولایەک پارێزراوبێت"، ئه‌مه‌ش به‌پێی راگه‌یه‌ندراوه‌كه.
AM:12:15:11/09/2024
ئه‌م بابه‌ته 1052
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت