قوباد تاڵه‌بانی بۆ خوشك و برا مه‌سیحیه‌كانی هه‌رمۆته: هاتووم تا له‌نزیكه‌وه گوێبیستان بم
وێستگه‌نیوز-
جێگری سه‌رۆك وه‌زیرانی هه‌رێمی كوردستان خوشك و برا مه‌سیحیه‌كانی هه‌رمۆته‌ی به‌سه‌ركرده‌وه و رایگه‌یاند كه "هاتووم تا له‌نزیكه‌وه گوێبیستان بم و هه‌میشه له‌دڵه‌وه نزیكی ئێوه‌بووم".
قوباد تاڵه‌بانی، جێگری سه‌رۆك وه‌زیران له‌سه‌ردانێكدا بۆ گوندی هه‌رمۆته له‌سنوری كۆیه له ارودۆخی ژیان و گوزه‌رانی خوشك و برا مه‌سیحیه‌كانی پرسییه‌وه.
به‌گوێره‌ی راگه‌یه‌ندراوێكی نووسینگه‌كه‌ی، له‌میانی سه‌ردانه‌كه‌ی رۆژی چوارشه‌ممه 15ی ئایاری 2024 دا بۆ سنوری كۆیه، جێگری سه‌رۆك وه‌زیران بۆ خوشك و برا مه‌سیحیه‌كان رایگه‌یاند: "به‌پێویستم زانی خۆم بێمه خزمه‌تتان، دڵنیاتان ئه‌كه‌مه‌وه كه هه‌میشه له‌دڵه‌وه نزیكی ئێوه‌بووم، چونكه ده‌زانم ئێوه‌ی خزمان چه‌ند خۆشه‌ویست بوون لای خوالێخۆشبوو جه‌نابی مام جه‌لال و ده‌شزانن كه چه‌ند تایبه‌تمه‌ندی دابووه خوشك و برایانی مه‌سیحی و هه‌رمۆته، بۆیه ئه‌م ده‌رفه‌ته ئه‌ده‌ین به‌خۆمان كه (كۆیایه‌تی و خۆیایه‌تی)ش بكه‌ین".
قوباد تاڵه‌بانی، ئاماژه‌ی به‌وه‌شكرد كه "كۆیه و مێژووه‌كه‌شی هه‌میشه ناسراو بووه به‌و جوانییه‌ی كه لێره ده‌یبینم له پێكه‌وه‌ژیانی ئاشتیانه".
وتیشی: "هیوادارم ئه‌و نموونه جوانه‌ی كه ئێوه توانیوتانه په‌یڕه‌وی بكه‌ن، نمونه‌یه‌ك بێت بۆ هه‌موو كوردستان و عێراق".
جێگری سه‌رۆك وه‌زیران، به‌خوشك و برایانی مه‌سیحی راگه‌یاند كه "هاتووم تا له‌نزیكه‌وه گوێبیستان بم، تا بزانین چۆن زیاتر هاوكارتان بین و خزمه‌تتان بكه‌ین و هه‌ندێ له‌و ئاسته‌نگانه‌ی هه‌تانه چاره‌سه‌ری بكه‌ین".
وه‌ك له راگه‌یه‌ندراوه‌كه‌دا هاتووه، كۆبوونه‌وه‌ی جێگری سه‌رۆك وه‌زیران و خوشك و برایانی مه‌سیحی هه‌رمۆته به‌گفتوگۆی چڕوپڕی هه‌مه‌لایه‌نه كۆتایی هات.
PM:05:31:15/05/2024
ئه‌م بابه‌ته 900
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت