مه‌سرور بارزانی‌: لێكوڵینه‌وه‌یه‌كی ورد له‌ هۆكار و چۆنیه‌تی رووداوه‌كه‌ی‌ فڕۆكه‌خانه‌ی عه‌ربه‌ت بكرێت


وێستگه‌نیوز-
سه‌رۆكی‌ حكومه‌تی‌ هه‌رێمی‌ كوردستان رایگه‌یاند كه‌ پێویسته‌ لێكوڵینه‌وه‌یه‌كی ورد له‌ هۆكار و چۆنیه‌تی رووداوه‌كه‌ی‌ فڕۆكه‌خانه‌ی عه‌ربه‌ت بكرێت.

ئه‌مڕۆ سێشه‌ممه‌ 19ی‌ ئه‌یلولی‌ 2023، مه‌سرور بارزانی سه‌رۆكی حكومه‌تی هه‌رێمی كوردستان په‌یامێكی‌ بڵاوكرده‌وه‌ و تیایدا هاتووه‌ كه‌ "ڕووداوه‌كه‌ی فرۆكه‌خانه‌ی عه‌ربه‌ت دڵگرانی كردووین".

مه‌سرور بارزانی ده‌ڵێت: "پێویسته‌ به‌ زووترین كات لایه‌نه‌ په‌یوه‌ندیداره‌كان لێكوڵینه‌وه‌یه‌كی ورد له‌ هۆكار و چۆنیه‌تی ئه‌م ڕووداوه‌ بكه‌ن و ڕاستیه‌كان ئاشكرا بكرێن".

سه‌رۆكی‌ حكومه‌تی‌ هه‌رێم ده‌شڵێت: "سه‌ركۆنه‌ی هه‌ر جۆره‌ پێشێلكردنێكی سه‌روه‌ریی خاكی كوردستان و عێراق و هه‌موو كارێكی نایاسایی ده‌كه‌ین كه‌ ده‌بێته‌ هۆی شێواندنی ئاسایش و سه‌قامگیریی هه‌رێمی كوردستان".

پاشنیوه‌ڕۆی رۆژی دووشه‌ممه‌ 18ی ئه‌یلولی 2023 فڕۆكه‌ی بێفڕۆكه‌وان فڕۆكه‌خانه‌ی كشتوكاڵی عه‌ربه‌تی كرده‌ ئامانج و به‌هۆیه‌وه‌ سێ پێشمه‌رگه‌ی دژه‌تیرۆری كوردستان (CTG) شه‌هیدبوون  و سێ پێشمه‌رگه‌ی دیكه‌ش برینداربوون.


AM:10:15:19/09/2023


ئه‌م بابه‌ته 1172 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت

هەواڵی پەیوەندیدار

زۆرترین خوێندراو