رەشنووسی پرۆژە یاسای بودجەی عێراق بۆ ساڵی 2023


ئامادە و پووختەکردنی: وێستگەنیوز

رەشنووسی پرۆژە بودجەی عێراقی فیدراڵ بۆ ساڵی 2023 کە بە ناونیشانی (بیان الموازنه‌ الاتحادیه‌ لسنه‌ 2023) لە لایەن وەزارەتی دارایی و بە ناوی طەیف سامی محەممەد، وەزیری دارایی عێراق بڵاوکراوەتەوە، لە پێشەکییەک و پێنج بەش بپێک هاتووە و هەر بەشێکیش چەند لقێکی لێ بوه‌تەوە، ئێمە لە وێستگەنیوز کرۆکی پرۆژەکەمان کردووە بە کوردیی و دەیخەینە بەردەست خوێنەرانی بەڕێز.


لە بەشی یەکەمدا بنەماکانی ئامادەکردنی ئەو پرۆژەیە ئاماژەیان پێ دراوە، کە بریتیین لە بنەما دەستووریی، یاسایی، ئابووریی، نەختینەیی، سیاسیی، کارگێڕیی، شەففافیی و کۆمەڵایەتییەکان، هەر یەکێک لە بنەماکانیش راڤە کراوە، یەکێک لە بنەما هەرە سەرەکییەکانی بودجەکەش بریتییە لە بەرنامەی ئەم حکومەتەی محەممەد شیاع سوودانی، کە بەرهەمی هاوپەیمانێتییەکی شیعیی-سووننیی-کوردییە.

لەم بەشەدا ئاماژە بە 15 بنەما کراوە و هەر بنەمایەکیش بە وردیی راڤە کراوە، روونیش کراوەتەوە کە چۆن ئەم بنەمایانە لە گەڵاڵەکردنی پرۆژە بودجەی ساڵی 2023دا رۆڵی بنچینەییان هەبووە. لە بنەمای (12)ـدا ئاماژە بە قەرزەکانی عێراق دراوە (ناوخۆیی و دەرەکییەکان)، لەو بڕگەیەدا ئاماژە بەوە دراوە کە لەم بودجەیەدا ئەوە لەبەرچاو گیراوە کە وادەیەک بۆ دانەوەی قەرزە ناوخۆییەکان دابنرێت و بڕی قەرزە دەرەکییەکانیش کەم بکرێنەوە، چونکە هێشتا عێراق ئەم قەرزانەی لە ئەستۆیە:
- 5.867 پێنج ملیار و هەشتسەد و شەست و حەوت ملیۆن دۆلار قەرزی پێش ساڵی 1990.

- 40.401 چل ملیار و چوارسەد و یەک ملیۆن دۆلار قەرزی چارەسەرنەکراوی وڵاتانی دەرەوەی یانەی پاریس.

- 12.926 دوانزە ملیار و نۆسەد و بیستوشەش ملیۆن دۆلار قەرزی دوای ساڵی 2003 کە زۆرینەی بەهۆی شەڕی داعشەوە کەوتۆتە سەر ئەستۆی عێراق.

- 70.505 حەفتا تریلیۆن و پێنجسەد و پێنج ملیار دینار قەرزی ناوخۆیی.

لە بەشی دووەمدا ئاماژە بە گرنگترتن ئاڵنگارییەکانی بەردەم جێبەجێکردنی ئەم پرۆژە بودجەیە کراوە، کە گرنگترینیان بریتیین لە:
- ئامادەگیی ڕەهەندەکانی شلۆقیی و ناجێگیریی سیاسیی لە ناوخۆ و دەرەوە کە وایان کردووە ڕەهەندی نەرێنیی بن و فشاری نەرێنییش بخەنە سەر دۆخی ئابووریی و دارایی وڵات.

- ناجێگیریی نرخی دیناری عێراقیی بەرانبەر دۆلار و هەموو ئەوەی پەیوەستە بەم هەڵبەز و دابەزەی نرخی دیناری عێراقییەوە.

- (داهاتی نانەوتیی)، بە هۆی کەمیی وزەی کارەبا و دەگمەنیی سەرچاوەکانی ئاو و سنوورداریی دەستڕاگەیشتن بە دڵنیایی و دۆخی ئەمنیی و ئاڵنگارییەکانی بازاڕ و ژینگەی کارەوە؛ هەر بە سنوورداریی دەمێنێتەوە.

- گەورەترین ئاڵنگاریی و مەترسیی ئابوورییش بریتییە لە گرێدراوی ئەم ئابوورییە بە نرخی نەوتەوە، چونکە هەر کات بازاڕی جیهانی خواستی لەسەر نەوت کەم بووەوە ئابووریی عێراق یەکەم زیانمەند دەبێت، هەربۆیە زۆر گرنگە وەکو ئەوەی لە بەرنامەی ئەم حکوومەتەدا ئاماژەی پێ دراوە، لەماوەی سێ ساڵدا پشتبەستن بە داهاتی نەوت بهێنرێتە خوارەوە بۆ ئاستی 80٪.

- ئاڵنگارییەکی دیکە هەر پەیوەستە بە نرخی نەوتەوە، ئەویش ئەگەر سزا بەسەر کۆمپانیا بەرهەمهێنەکانی نەوتی ڕووسی لە عێراق بسەپێنرێت، یان شەپۆلێکی دیکەی کۆڤید 19 بڵاو بێتەوە، یاخود بەرمەبنای جێبەجێکردنی ستانداردە جیهانییەکان بۆ کەمکردنەوەی کاریگەرییەکانی گەرمبوونی زەوی و گۆڕانی کەشوهەوا پشتبەشتن بە نەوت کەمبکرێتەوە، هەموویان گورزی پشتشکێن دەبن لە ئابووریی پشتبەستووی عێراق بە داهاتی نەوت.

- ئاڵنگارییەکی دیکە پەیوەستە بە لاوازیی و خراپیی سیستمی نەختینەیی عێراقەوە، کە توانای دابینکردنی سیولەی نەختینەیی بۆ چالاکییە ئابوورییەکان زۆر سنووردارە، بە گشتیی و لە هەموو ڕوویەکەوە ئەم سیستمە نەختینەیییە کێشەیەکی گەورەیە لەبەردەم ئەم پرۆژە بودجەیەدا.

- بەردەوامیی لاوازیی و کەمیی سەرچاوەکانی داهاتی دیکە وەکو باج و گومرگ، لەکاتێکدا ئەو دوو داهاتە دەکرێت هێزێکی گەورە بە داهاتی عێراق ببەخشن، هەر بۆیە داوا کراوە کە بە زووترین کات ڕسوماتی گومرگیی یەکگرتوو لە هەموو دەروازە سنوورییەکان جێبەجێ بکرێت.

- کاریگەرییە خراپەکانی دواکەوتن و نەبوونی بودجە لە ساڵانی 2020 و 2022 کە هەموو ئاکامە نەرێنییەکانی هاتوونەتە ئەم ساڵەوە، کە بڕێکی زۆر لە پابەندیی دارایی و نەختینەیی تێدایە هەر لە قەرز و شاییستەی دارایی و بابەتی دیکە.

- تەواوکردنی پرۆسەی چاکسازیی لە بواری دارایی و ئابووریی و بەتایبەتیی لە سەرلەنوێ ڕێکخستنەوەی هەیکەلی کارگێڕیی هەردوو بانکی (ڕەشید) و (ڕافیدەین) و باقیی بانکە حکوومییەکانی دیکە، ئەویش بۆ ئەوەی سەرمایەی ئەو بانکانە زۆرتر بکرێت و کەرتی بانکی ببووژێتەوە.

- دۆزینەوەی چارەسەرێکی دەستووری بۆ ئەو ناکۆکییە دارایییانەی لەگەڵ هەرێمی کوردستان هەن،  لەسەر بنەمای بڕینی بودجە سیادییەکان، داهاتی نەوت و گومرگ و هەر پابەندییەکی دیکەی کە هەرێم لە هەمبەر حکوومەتی فیدڕاڵییدا هەیەتی.

- دابینکردنی بودجەی پێویست بۆ پرۆژە گەورەکانی وەکو بەندەری فاو، هێڵی شەمەندۆفێری هەڵواسراوی بەغدا، سازگارکردنی ئاوی بەسڕە و هەموو ئەو پرۆژە وەستاوانەی دیکە کە پێویستیان بە بودجە هەیە بۆ سەرلەنوێ بەگەڕخستنەوە.

بودجەی پرۆژە لەپێشینەکان بە پشتبەستن بە بەرنامەی حکوومەت

ئەم پرۆژانەی لە خوارەوە ئاماژەیان پێ دراوە لەسەر بنەمای ئەو پرۆژانەی لەپێشینە (ئەولەوییات)یان هەیە لە بەرنامە (منهاج الحکومة)ـدا بودجەیان بۆ دیاریی کراوە کە بە هەردوو بودجەی سەرمایەگوزاریی و تەشغیلییەوە بڕی (٧.١٦٢.٠٠٠.٠٠٠) حەوت ترلیۆن و سەد و شەست و دوو ملیار دیناری عێراقیی بۆ تەرخان کراوە و پرۆژەکانیش بریتیین لە بوارەکانی:

یەکەم؛ چاودێریی کۆمەڵایەتیی: بڕی (١.٢٠٠.٠٠٠.٠٠٠) یەک ترلیۆن و دووسەد ملیار دینار بودجە بۆ چین و توێژە هەژارەکان تەرخان کراوە، ئەوانەی بە هۆی خراپی باری دارایی و بێکاریی و دۆخی تایبەتەوە پێویستیان بە دەستگرۆیی هەیە، ئەویش بەو جۆرەی خوارەوە:

- زیادکردنی بڕی (٦٥٠) ملیار دینار بۆ ئەوانەی مووچەی چاودێریی کۆمەڵایەتیی دەیانگرێتەوە.

- زیادکردنی بڕی (١٥٠) ملیار دینار بۆ ئەوانەی چاودێریی خاوەن پێداویستیی تایبەت دەکەن.

- زیادکردنی سەرمایەی سندوقی قەرزی بێکاران بە بڕی (٤٠٠) ملیار دینار.

دووەم؛ بواری تەندرووستیی: بۆ کەرتی تەندرووستیی لە بوارەکانی هاوردەکردنی دەرمان، جێبەجێکردنی پلانەکانی وەزارەتی تەندرووستی و سەرخستنی پلانی حکوومەت بۆ هەڵمەتی نیشتیمانیی کوتان، بڕی (١.٥٨٠.٠٠٠.٠٠٠) یەک ترلیۆن و پێنجسەد و هەشتا ملیار دینار تەرخان کراوە، ئەویش بەو جۆرەی خوارەوە:

- تەرخانکردنی بڕی (٢٠٠) ملیار دینار بۆ پەرەپێدان و چاکسازیی لە بواری چارەسەر و خزمەتگوزاری پزیشکیی لە بنکەکانی تایبەت بە نەشتەرگەریی و چارەسەری نەخۆشییەکانی دڵ و خوێنبەرەکان.

- تەرخانکردنی بڕی (٢٠٠) ملیار دینار بۆ پەرەپێدانی خزمەتگوزاریی تەندرووستیی لە بنکەکانی چارەسەرکردنی شێرپەنجە.

- تەرخانکردنی بڕی (٤٣٥) ملیار دینار بۆ درووستکردنی پێنج نەخۆشخانە لە شارەکانی زیقار، نەجەف، بەسڕە، بابل و کەربەلا.

- تەرخانکردنی بڕی (١٥٠) ملیار دینار بۆ خزمەتگوزاریی تایبەت بەوانەی بیمەی تەندرووستیی دەیانگرێتەوە.

- تەرخانکردنی بڕی (٤٤٨) ملیار دینار بۆ پاڵپشتییکردنی کڕینی دەرمان و پێداویستییە پزیشکییەکان.

- تەرخانکردنی بڕی (١٤٧) ملیار دینار بۆ تەئسیسکردن و کڕینی پێداویستییەکانی ١٠ نەخۆشخانەی یابانیی کە لە ساڵانی هەشتای سەدەی ڕابردوودا درووستکراون.

سێیەم؛ بواری ئاوەدانکردنەوە و نیشتەجێکردن و شارەوانییەکان: سەربارکردنی بودجەی دیکە بۆ چەند پرۆژەیەکی گرنگ کە تێکڕاکەی بریتییە لە (١.٩٠٣.٠٠٠.٠٠٠) یەک ترلیۆن و نۆسەد و سێ ملیار دینار لەوانەش:

- بڕی (٤٠٠) ملیار دینار بۆ پرۆژەی سازگارکردنی ئاوی دەریا لە شاری بەسڕە.

- بڕی (٦٠٠) ملیار دینار بۆ قۆناغی یەکەمی شەقامی بازنەیی.

- بڕی (٣٠٣) ملیار دینار بۆ پرۆژەکانی ژێرخان لە پارێزگای دیوانییە.

- بڕی (٦٠٠) ملیار دینار بۆ پرۆژەکانی ڕاژەی خزمەتگوزاریی و ئەندازەیی.

چوارەم؛ بۆ پیشەسازیی و کانزاکاریی: کۆی بودجەی ئەم بوارە کە بڕەکەی (١٠٧) ملیار دینارە بۆ قۆناغی یەکەمی لێکۆڵینەوە و نەخشەسازیی و ڕاوێژکاریی پرۆژەی زەبەلاحی (نیبراس)ـی پێترۆکیمایی تەرخان کردووە کە یەکێکە لە پرۆژە لەپێشینەکانی ئەم کابینەیە.

پێنجەم؛ کارەبا: بۆ بواری کارەبا کە یەکێکە لە لاوازترین کەرتە خزمەتگوزارییەکانی عێراق، بڕی (١.٢٦٢.٠٠٠.٠٠٠) یەک ترلیۆن و دووسەد و شەست و دوو ملیار دینار تەرخان کراوە بۆ پرۆژەکانی خوارەوە:

- بڕی (٢٨٠) ملیار دینار بۆ بەگەڕخستنەوە و چاکسازیی لە پرۆژەکانی وێستگەی بەرهەمهێنانی کارەبا.

- بڕی (٣٣٢) ملیار دینار بۆ ئامادەکردنی ١٥٠ وێستگەی گۆڕەری کارەبای بزۆک بۆ هاوینی داهاتوو.

- بڕی (٣٢٥) ملیار دینار بۆ بەگەڕخستنەوە و چاکسازیی کۆمپانیای (GE).

- بڕی (٣٢٥) ملیار دینار بۆ بەگەڕخستنەوە و چاکسازیی (ئێلێکتریک ئینتەرناشناڵ ئینک).

شەشەم؛ بواری پلاندانان: بۆ بواری پلاندانان بڕی (١.٥٠٠.٠٠٠.٠٠٠) یەک ترلیۆن و پێنجسەد ملیار دینار تەرخان کراوە بۆ دوو بوار: یەکەمیان بڕی ١ ترلیۆن دیناری سەرمایەگوزاریی بۆ سندووقی گەشەپێدانی عێراق و ٥٠٠ ملیار دیناری سەرمایەگوزاریی بۆ سندووقی پەرەپێدانی پارێزگا هەرەهەژارەکان.

حەوتەم؛ کشتوکاڵ: دابینکردنی بڕی  (١٠.١٧٠) دە ملیار و سەدوحەفتا ملیۆن دینار بۆ دەرچوواندنی کارتی کشتوکاڵیی.

هەشتەم؛ چاکسازییە هەنووکەییەکانی کەرتی بانک: تەرخانکردنی بڕێکی سەربار بۆ سەرمایەی بانکی پیشەسازیی بە بڕی (٥٠٠) ملیار دینار بۆ بەرزکردنەوەی ئاستی کارکردنی بانکەکە. تەرخانکردنی بڕی (٢٥٠) ملیار دینار بۆ قەرزەکانی بانکی نیشتەجێکردن و (١٠) ملیار دیناریش قەرز بۆ کۆمپانیای (ئەلجوهد)ـی خزمەتگوزاریی سەر بە حەشدی شەعبی.


بنەماکانی خەمڵاندنی بودجەی فیدراڵیی

ئەم بودجەیە لەسەر کۆمەڵێک بنەما خەمڵێنراوە کە پەیوەستن بە داهات و خەرجییە گشتییەکانەوە، حکوومەت لەسەر ئەم گریمانانەی خوارەوە بودجەی ٢٠٢٣ی داڕشتووە:

- زیادبوونی تێکڕای گەشەی بەرهەمی ناوخۆیی بە نرخی ئێستای کە گەیشتۆتە ٤.٥٪ هەروەها گەشەکردن بەرهەمی ناوخۆیی جگە لە نەوت بە ڕێژەی ٣٪ بۆ ساڵی ٢٠٢٣.

- ڕێگرییکردن لە فشاری هەڵاوسان بۆ گەرەنتییکردنی ئەوەی ٥٪ تێنەپەڕێنێت، ئەوەش لەپێناو پارێزگارییکردن لە ئاستی گوزەرانی خێزان و تاکەکان.

- تێکڕای نرخی نەوت بە ٧٠ دۆلار دیاریی کراوە.

- بڕی هەناردەکردنی نەوت گەیشتۆتە ٣.٥٠٠.٠٠٠ سێ ملیار و پێنجسەدهەزار بەرمیل بەو ٤٠٠.٠٠٠ چوارسەد هەزار بەرمیلە ڕۆژانەیەی هەرێمی کوردستانیشەوە.

- نرخی گۆڕینەوەی دۆلار ١٣٠٠ هەزار و سێسەد دینارە لە بەرانبەر یەک دۆلار.

بەرمەبنای ئەم خەمڵاندنەش داهات و خەرجییەکان بەو جۆرەی خوارەوە دەرئەنجامگیرییان لێ کراوە:

٥-١: خەرجییە گشتییەکان: بودجەی ٢٠٢٣ پێشنیاری خەرجییە گشتییەکان دەکات بە بڕی (١٩٨.٦٨٣.٧١٩.٤٧٢) سەد و نەوەد و هەشت تریلیۆن و شەشسەد و هەشتا و سێ ملیار و حەوتسەد و نۆزدە ملیۆن و چوارسەد و حەفتا و دوو هەزار دیناری عێراقی، کە دابەش دەبێت بەسەر ٧٥٪ خەرجی تەشغیلیی و ٢٥٪ تێچووی سەرمایەگوزاریی و ٦.٤٪ خزمەتگوزاریی قەرزی گشتیی. کە ٢٩.٧٪ی ئەوەش قەرەبووی فەرمانبەرانە کە لە پێناو پێداویستییەکانی دامەزراندنی نوێ دەبن کە حکووومەت پەسەندی کردووە، ١٤.٦٪یش بۆ دابینکردنی پێداویستییەکانی چاودێریی کۆمەڵایەتییە، کە لە دونیابینیی حکوومەتدا بایەخێکی بەرچاوی هەیە، هەروەها لەپێناو پڕکردنەوەی پیداویستییەکانی هاوڵاتییاندا.

لە ڕووی بودجەی سەرمایەگوزارییشەوە بودجەی ٢٠٢٣ پلانێکی سەرمایەگوزاریی گەورە و گەشبینانەی داناوە کە دەگاتە ٤٩.٤١٩ چلونۆ تریلیۆن و چوارسەد و نۆزدە ملیار دینار، کە ئەمەش دەکاتە ٢٥٪ی کۆی خەرجییەکان. خەرجی سەرمایەگوزارییش کە بەکردارییکردنی پرۆژە لەپێشینەکانی حکوومەتە لە کۆمەڵێک لقەبەرنامەی کەرتە جیاوازەکانی وەکو: کۆمەڵایەتیی، تەندرووستیی، ئاوەدانکردنەوە، پیشەسازیی و کارەبا، کشتوکاڵ، ڕووبەڕووبوونەوەی هەژاریی، بەجێگەیاندنی گەشەپێدان، ئاوەدانکردنەوەی پارێزگاکان و حکوومەتی ئەلەکترۆنیی، کە لەناو ئەمانەشدا لەپێشینەیی (ئەولەوییەت) دراوە بەم پرۆژانەی لای خوارەوە:

 
پرۆژە سەرمایەگوزارییەکانی بەرنامەی حکوومەت:
    

٣.٦٦٣ تریلیۆن دینار      
    

پرۆژەی پارەدارکراو بە قەرزی بیانیی
    

٩.٩٦٤ تریلیۆن دینار
    
پرۆژەی بەندەرەکان و لەناویشیاندا بەندەری فاو
    

١.٦٠١ تریلیۆن دینار
    
سندوقی گەشەپێدانی عێراق


١ تریلیۆن دینار
    
ستراتیژی کەمکردنەوەی هەژاریی
    

٥٠٠ ملیار دینار
    
پرۆژەکانی پێترۆدۆلار
    
٢ تریلیۆن دۆلار
    
پرۆژەکانی تایبەت بە هەژاریی
    
١٠٠ ملیار دینار
    
پرۆژەی پەرەپێدانی هەرێمەکان
    
٢.٥٠٠ تریلیۆن دینار
    
گرێبەستەکانی نەوت بەوانەی هەرێمی کوردستانیشەوە
    
١٥ تریلیۆن دینار
    
پرۆژە خۆجێیەکانی کۆمپانیاکانی نەوت
    
١.٤٢٥ تریلیۆن دینار
    
پرۆژەی وەزارەتەکانی دیکە بەوانەی هەرێمیشەوە، کە دەگاتە ٢.١١٩ تریلیۆن دینار، جگە لە قەرزەکان و پەرەپێدانی هەرێمەکان
    
٧.٦٤٨ تریلیۆن دینار
    
٥-٢: داهاتە گشتییەکان: وەکو هەموو ساڵانی پێشوو داهاتی سەرەکی عێراق پەیوەستە بە نرخی نەوتی خاو و بڕ و ڕێژەی نەوتی هەناردەکراو، هەروەها لە داهاتی پێشبینییکراوی نەوتی خاوی ناوەند و هەرێم، سەرەڕای خەرجیی گشتیی و نرخی گۆڕینی دیناری عێراقیی بەرانبەر دۆلار. بەپێی ئەم پێدراوانە داهاتەکان لەم پرۆژە بودجەیەدا دەگاتە (١٣٤.٥٥٢.٩١٩.٠٦٣.٠٠٠) دینار. کە داهاتی نەوت و سامانی کانزاکان ڕێژی ٨٧٪ی پێک دەهێنن ئەوەش وەکو هەوڵێک بۆ کەمکردنەوەی بڕی داهاتی گشتیی لە نەوت و گەیشتن بە ئامانجی کەمکردنەوەی پشتبەستن بەو داهاتە بۆ ئاستی ٨٠٪.

وەکو پێشتریش ئاماژەی پێ درا، بە پشتبەستن بە بەرنامەی ئەم کابینەیەی حکوومەت بڕیار دراوە کە نابێت بە تەنیا پشت بە داهاتی نەوت ببەسترێت وەکو تاکە سەرچاوەی دانانی بودجە، هەر بۆیە بڕیار درا کە ڕستێک چاکسازیی و ڕێکار لە بوارەکانی گومرگ و باجەکاندا ئەنجام بدرێن ئەوە سەرباری دژایەتییکردنی گەندەڵیی لەم بوارانەدا بۆ ئەوەی ئەمانەش ببنە سەرچاوەیەکی داهات بۆ بودجەی ٢٠٢٣.

- ڕێکاریی چاکسازیی کارگێڕیی لە بواری باجەکان و گومرگدا جێبەجێ دەکرێن، لە ڕێی هەماهەنگیی لەگەڵ (ئۆنکتاد) و پێڕەوکردنی سیستمی (FMIS). بە جۆرێک هەندێک باج زیاد کراون کە بریتیین لە:    

باجی خزمەتگوزاریی لەسەر مۆڵ و سوپەرمارکێتە گەورەکان کە پێشبینیی دەکرێت داهاتەکەی بگاتە ٢٢٥ ملیار دینار.

باجی سووتەمەنی هاوردەکراو لەسەر وێستگەکانی سووتەمەنیی ئۆتۆمۆبێل کە چاوەڕێ دەکرێت داهاتەکەی بگاتە ٢٥ ملیار دینار.

ڕسووماتی نوێ لەسەر بەنزین کە پێشبینیی دەکرێت داهاتەکەی ٤٥٠ ملیار دینار بێت.

ڕسووماتی نوێ لەسەر گاز کە پێشبینیی دەکرێت داهاتەکەی ٤٥ ملیار دینار بێت.

ڕسووماتی نوێ لەسەر داهاتی نەوتی ڕەش کە پێشبینیی دەکرێت داهاتەکەی ٥٠ ملیار دینار بێت.

داهاتی فرۆشتنی نەوتی خاو بە کۆمپانیاکانی پاڵفتەکردن کە پێشبینیی دەکرێت بڕی ٢.٢٠٠ تریلیۆن دینار داهاتی بێت.

- گەڵاڵەکردنی پرۆژە یاسا بۆ کۆکردنەوەی داهاتی کۆمپانیاکانی کارەبا و کۆمپانیاکانی دیکە و هەموو بەڕێوەبەرایەتییە خزمەتگوزارییەکان بە ئامانجی کاراکردنی داهاتی ئەو کۆمپانیا و دامەزراوانە بۆ ئەوەی پاڵپشتیی داراییان هەمووی نەکەوێتە ئەستۆی گەنجینەی گشتیی دەوڵەت.

٥-٣: داهاتە گشتییەکان: تێكرای عیجزی پلانبۆدانراو لە بودجەی ساڵی ٢٠٢٣دا دەگاتە (٦٤.١٣٠.٨٠٠.٤٠٩) شەست و چوار تریلیۆن و سەد و سیی ملیار و هەشتسەد ملیۆن و چوارسەد و نۆ هەزار دینار، کە بە پشتبەستن بە زیادەی نرخی نەوتی فرۆشراو، زیادەی نەوتی بەرهەمهێنراوی فرۆشراو، قەرزی دەرەکیی و ناوخۆیی و ژمارەیەک سەرچاوەی دیکە پڕ دەکرێنەوە.


AM:11:05:19/03/2023


ئه‌م بابه‌ته 1164 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت