نەوەی نوێ: بەهۆی دەستگیرکردنی سەدان هاوڵاتی و ئەندامانمان بەشداری کۆبوونەوەی لایەنەکان ناکەین

وێستگەنیوز-

جوڵانەوەی نەوەی نوێ بڕیاریدا بەشداری کۆبوونەوەی ئەمڕۆی لایەنەکان لە سەرۆکایەتی هەرێم نەکات. لەبارەی هۆکارەکەشیەوە دەڵێت، "بەهۆی دۆخی ئەم هەفتەیە و دەستگیرکردنی سەدان هاوڵاتی و ئەندامی باڵای نەوەی نوێ ئەو بڕیارەماندا".

ئەمڕۆ چوارشەممە 10 ی ئابی 2022 بەسەرپەرشتی سەرۆکی هەرێمی کوردستان و ئامادەبوونی جێنین پلاسخارت، کەسی یەکەمی بەشێکی زۆر لە حیزبەکان لە سەرۆکایەتیی هەرێمی کوردستان کۆدەبنەوە و هەڵبژاردنی هەرێمی کوردستان تاوتوێ دەکەن.

نەوەی نوێ لەوبارەیەوە ڕاگەیەندراوێکی بڵاو کردەوەو تێیدا هاتووە، "بریار بوو ئەمرۆ چوارشەممە ٢٠٢٢/٨/١٠ هیمداد شاهین لە بری سەرۆکی جوڵانەوەکە شاسوار عەبدولواحید بەشداریی کۆبونەوەی لایەنەکان بکات لە سەرۆکایەتیی هەرێم.
بەڵام بە هۆی دۆخی ئەم هەفتەیە و زیندانیکردنی سەدان هاوڵاتیی و بەشی زۆری ئەندامانی ئەنجومەنی باڵای نەوەی نوێ و چەندین خۆبەخشی جوڵانەوەکە، بریاڕماندا کە بەشداری کۆبونەوەکە نەکەین".

نەوەی نوێ ئاماژە بەوەش دەکات، "بەڵام سەرباری ئەوەش پێمانوایە هەڵبژاردن رێگایەکی گرنگە بۆ گۆڕینی ئەم دەسەڵاتە و باشترکردنی دۆخی خەڵک، بۆیە بە هەموو شێوەیەک پشتیوانیی لە ئەنجامدانی هەڵبژاردنێکی پاک و بێگەرد دەکەین لە نزیکتریین کاتدا و بە سەرپەرشتیی نەتەوە یەکگرتوەکان و کۆمسیۆنێکی پاک و بێلایەن.
بۆیە جگە لەو خاڵە هیچ وردەکارییەکیتر لای نەوەی نوێ هێندە گرنگ نییە بەقەد ئەنجامدانی هەڵبژاردن و کۆمسیۆنێکی بێلایەن".

AM:11:44:10/08/2022

ئه‌م بابه‌ته 836 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت