وه‌زاره‌تی دارایی لەبارەی خەرجییەكانی خوێندنی باڵاوە روونكردنه‌وه ده‌دا
وێستگه نیوز ـ
وه‌زاره‌تی دارایی و ئابوریی هەرێمی كوردستان لەبارەی خەرجییەكانی وەزارەتی خوێندنی باڵا روونكردنەوەی دا، لەمساڵدا تا ئێستا زیاتر لە 14 ملیار دینار بۆ وەزارەتەكە خەرجكراوە، 183 نووسراویشیان بە هۆكاری جیا رەتكراوەتەوە.
وه‌زاره‌تی دارایی لە روونكردنەوەكەیدا سه‌باره‌ت به خه‌رجی وه‌زاره‌تی خوێندنی باڵا و توێژینه‌وه‌ی زانستی ئاشكرایكردووە، له سەرەتای ئەمساڵەوە تا 24ی تشرینی دووه‌می 2021، ره‌زامه‌ندی له‌سه‌ر 369 نووسراوی وه‌زاره‌تی خوێندنی باڵا دراوه، كه بڕه‌كه‌ی 14 ملیار و 262 ملێون و 911 هه‌زار و 240 دیناره، ئه‌م بڕه پاره‌یه تا 15ی كانوونی یه‌كه‌می 2021 زیاتر ده‌بێت.
وه‌زاره‌تی دارایی دەشڵێت، "هەر لە هەمان ماوەدا، واتا لەسەرەتای ساڵەوە، 183نووسراوی وەزارەتی خوێندنی باڵا ڕه‌تكراونه‌ته‌وه، بەهۆی چەند هۆكارێك، لەوانە، هه‌ندێك نووسراو پێچه‌وانه‌ی رێنمایی دارایی بووه، هه‌ندێكیشیان كه‌موكوڕییان هه‌بووه و وه‌ڵامدراونه‌ته‌وه، بەشێكیشیان بە ره‌چاوكردنی بارودۆخی دارایی هه‌رێم به رێنمایی ژمارە 50 پاڵپشت به بڕیاری ژمارە 14ی ئه‌نجومه‌نی وه‌زیران ره‌تكراونه‌ته‌وه".
دیار نییە وەزارەتی دارایی بۆچی ئەم روونكردنەوەیەی داوە، بەڵام لەدوای خۆپیشاندانی خوێندكاران و داواكردنی دەستكردنەوە بە خەرجكردنەوەی دەرماڵە، پرسی خەرجییەكانی وەزارەتی خوێندنی باڵا و توانای وەزارەتەكە و حكومەت بۆ خەرجكردنەوەی دەرماڵە بووەتە بابەت.
PM:01:40:30/11/2021
ئه‌م بابه‌ته 1668
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت