جۆرێکی "مەترسیداری" کۆرۆنا لەڤێتنام سەرهەڵدەدات


وێستگەنیوز-

وەزارەتی تەندروستی ڤێتنام بڵاویکردەوە، جۆرێکی نوێی کۆرۆنای گۆڕاو لەوڵاتەکەیاندا سەری هەڵداوە و کە‌هەڵگری تایبەتمەندییەکی تێکەڵە لەهەردو کۆرۆنای گۆڕاوی بریتانی و هیندی، جەختیش دەکاتەوە ئەو جۆرە کۆرۆنای گۆڕاو مەترسیدارە و بەئاسانی لەرێگەی هەواوە دەگوازرێتەوە.

نگۆین سان لۆنگ، وەزیری تەندروستی ڤێتنام بەمیدیاکانی وڵاتەکەی راگەیاندوە،  جۆرێکی نوێی کۆرۆنای گۆڕاو لە ڤێتنام سەری هەڵداوە کە جۆرێکی "مەترسیدارە" و بەگوێرەی پشکنینی ئەو کەسانەی توشی پەتاکە بون، جۆرە گۆڕاوەکەی کۆرۆنا تێکەڵەیەکە لەهەردو جۆرە ناسراوەکەی کۆرۆنای گۆڕاو کەئەوانیش کۆرۆنای گۆڕاوی بریتانی و هیندین.

ئاماژەی بەوەشکردوە، ئەوەی تێبینی کراوە و لەئەنجامی پشکنینی توشبوان دەستیانکەوتوە، کۆرۆنای گۆڕاوی ڤێتنامی جۆرێکی مەترسیدارترە و بەئاسانیش لەرێگەی هەواوە دەگوزرێتەوە.

لەماوەی کەمتر لەمانگێکدا زیاتر لە 3600 (سێ هەزار و شەش سەد) کەس بە کۆرۆنا لە ڤێتنام مردون کە نیوەی تێکڕای ئەو کەسانەن لەسەرەتای بڵابونەوەی پەتاکە لەو وڵاتەدا مردون.

بەگوێرەی دواین ئامارەکان تائێستا 170،190،564 (سەد و حەفتا ملیۆن و سەد و نەوەد هەزار و پێنج سەد و شەست و چوار) کەس لەجیهان توشی کۆرۆنا بون، لەو ژمارەیەش 3،539،173 (سێ ملیۆن و پێنج سەد و سی و نۆ هەزار و سەد و حەفتا و سێ) توشبو بەهۆی کاریگەری پەتاکەوە مردون.


PM:11:11:29/05/2021


ئه‌م بابه‌ته 632 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت