وێنەیەکی عەلی ئەکبەر مورادی لەسەر دیوارێکی شاری تاران دەکێشرێت

وێستگەنیوز_راژان رزگار

لە میانەی ئەو خزمەتە بەرچاوەی بە هونەر و موزیکی کوردی کردووە، لە شاری مهابادی رۆژهەڵاتی کوردستان وێنەی هونەرمەند و موزیسیانی دیاری کورد عەلی ئەکبەر مورادی کێشرا.

رێکخراوی رازاندنەوەی شارەوانی تاران، لەسەر یەکێک لە دیوارەکانی شەقامی ئازادی لە دەروازەی فرۆکەخانەی مەهاباد، هەستان بە کێشانی وێنەی، عەلی ئەکبەر مورادی، هونەرمەند و موزیسیانی دیاری کورد، ئەمەش بە مەبەستی ستایشکردنی ئەم هونەرمەندە لەپای خزمەتکردنی بە هونەر و موزیکی کوردی.

دروستکردنی وێنەی ئەم هونەرمەندە لەسەر ئەو دیوارە، تیشک دەخاتە سەر ئەو دەستکەوتە هونەرییانەی مورادی و خزمەتکردنی بە ناوچەکانی کرماشان و مەهاباد، ئەمەش وەک هەنگاوێکی گرنگ و ئەرێنی هونەری لە لایەن هونەرمەندانەوە پێشوازیلێدەکرێت.

هەر لەم بارەیەشەوە، پەیوەست بە خزمەتکردن و ڕۆڵی عەلی ئەکبەر مورادی لە دنیای موزیک و هونەردا، خەڵاتی ساڵانەی ماملێ بۆ ساڵی 2025 لە لایەن ناوەندی ماملێوە پێشکەشکرا، هەروەها لە چەند ساڵی رابردوودا لە شاریسلێمانی لە پای هەوڵ و خزمەتەکانی لە هونەر و میوزیکی کوردیدا، خەڵاتی زێڕینی بلەی پێبەخشرا.

ئەوەش لە کاتێکدایە، لە ساڵی 1957 لە ناوچەی گۆرانی سەر بە کرماشان لە رۆژهەڵاتی کوردستان لەدایکبووە، لە تەمەنی شەش ساڵییەوە بە هاندانی باوک و باپیری دەستی بە ژەندنی تەمبوور کردووە، مامۆستا بەتواناکانی وەک، "سەید هاشم، عەلی میردەرویشی، سەید مەحمودی عەلەوی، سەیید وەلی حسەینی و سەید عەلی کەفاشیان رۆڵیان لە پێگەیاندن و فیرکردنیدا بینیوە."

مورادی بە پارێزەر و ئەمانەتداری مەقاماتی تەمبوور ناسراوە، جگە لەوەی دەیان کۆنسێرتی بە گرووپ لە وڵاتانی جیهاندا سازکردووە، بە شێوەی سەربەخۆش چەند بەرهەمێکی بڵاوکردووەتەوە و لە بواری فێرکردن و لێکۆڵینەوەشدا رۆڵی کاریگەری هەبووە و چەندین بەرهەمی بە زمانی ئینگلیزی لە دەرەوەی وڵات چاپکراون.

PM:01:28:06/02/2025

ئه‌م بابه‌ته 564 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت