82مین خولی دابەشکردنی خەڵاتەکانی گۆڵدن گڵۆب بەڕێوەچوو

‌بەشێک لە ئەستێرەکانی سینەماو تەلەڤیزیۆن لە رێورەسمی دابەشکردنی خەڵاتەکانی گۆڵدن گڵۆب، وێنە؛ AFP

وێستگەنیوز_راژان رزگار

کاتژمێر 4:00ی بەیانی بە کاتی هەرێمی کوردستان، 82مین خولی دابەشکردنی خەڵاتەکانی گۆڵدن گڵۆب بۆ بەرهەمە سینەمایی و تەلەڤیزیۆنییەکانی ساڵی 2024 بەڕێوەچوو، تێدا چەندین بەرهەم و هونەرمەندی جیهانی خەڵاتیان پێبەخشرا.

ئەمڕۆ دووشەممە، 6ی کانوونی دووەمی 2025، کاتژمێر 4:00ی بەیانی بە کاتی هەرێمی کوردستان، 82مین خولی دابەشکردنی خەڵاتەکانی گۆڵدن گڵۆب بۆ بەرهەمە سینەمایی و تەلەڤیزیۆنییەکانی ساڵی 2024، لە هۆتێل بێڤرلی هیڵتن لە لۆس ئەنجلس بەڕێوەچوو.

لە میانەی دابەشکردنی خەڵاتە سینەمایی و تەلەڤیزیۆنییەکانی گۆڵدن گڵۆبدا، فیلمی Emilia perez بوو بە براوەی گەورەترین خەڵاتی ئەم ساڵ و توانی 4 خەڵات بەرێت و بەم شێوەیەش سەرنجی تەواوی ئامادەبوانی بە لای خۆیدا راکێشا.

لە لایەکی دیکەوە، فیلمیThe brutalist بوو بە براوەی 3 خەڵات و توانی بچێتە ریزی دیاترین بەرهەمەکانی نێو رێورەسمەکە، هاوکات، هەر یەک لە فیلمەکانی Anora, conclave، پیشبینی دەکرا زۆرترین خەڵاتی ڕێورەسمەکە ببنەوە، لە ئەنجامدا نەیانتوانی ببن بە براوەی هیچ خەڵاتێک.

لە میانەی دابەشکردنی خەڵاتە تەلەڤزیۆنیەکانیشدا، وەکو هەمووان پێشبینی و چاوەڕوانیان دەکرد، زنجیرە درامای Shogun، توانی دیارترین بەرهەم بێت و ببێت بە براوەی چوار خەڵات، هاوکات زنجیرە درامایBaby Reindee توانی ببێتە براوەی دوو خەڵات.

ریزبەندی دابەشکردنی خەڵاتەکانی گۆڵدن گڵۆب بۆ ساڵی 2024 بەم شێوەیەیە:

جێسیکا گەنینگ، لە زنجیرەی Baby Reindee، خەڵاتی باشترین ئەکتەری ژنی لە رۆڵی پاڵپشت بەدەستهێنا.

خەڵاتی باشترین ئەکتەری پیاو لە زنجیرەی تەلەڤزیۆنی موزیکی و کۆمیدی، بەخشرایە جێرمی ئالن وایت، لە زنجیرەی.The Bear

خەڵاتی باشترین سیناریۆی فیلم، بەخشرایە Conclave

خەڵاتی باشترین ئەکتەری پیاو لە زنجیرەیەکی کورت یاخود فیلمێکی تەلەڤزیۆنی کە بۆ تەلەڤزیۆن بەرهەمهاتبێت، بەخشرایە کۆڵن فێرڵ، لە زنجیرەی The Penguin

خەڵاتی باشترین ئەکتەری ژن لە فیلمی سینەمایی یاخود کۆمیدی، بەخشرایە دمی مۆڕ لە فیلمی The Substan

خەڵاتی باشترین ئەکتەری پیاو لە فیلمی سینەمایی یاخود کۆمیدی، بەخشرایە سێباستیان ستان لە فیلمی A Different Man

Flow خەڵاتی باشترین فیلمی ئەنیمەیشنی بەدەستهێنا و خەڵاتی باشترین دەرهێنەری فیلم بەخشرایە برەیدی کۆربات بۆ فیلمی The Brutalist

خەڵاتی باشترین میوزیکی وێنەیی رەسەن، بەخشرایە فیلمی Challengers و باشترین گۆرانی رەسەن بۆ فیلمی سینەمایی بەخشرایە فیلمی Emilia Pérez

بەدەر لە خەڵاتەکان، ئەستێرە دیارەکانی سەر فەرشی سووری رێوڕەسمەکە بریتیبوون لە، ئەنجلینا جۆلی، ئیما ستۆن، دوێن جۆنسن، کەیت بڵانچێت، نیکۆڵ کیدمەن، ئاریانا گراندی، ئاندرۆ گارفێڵد و چەندین ئەستێرەی دیکەی سینەمایی و تەلەڤزیۆنی.

گۆڵدن گڵۆب، بە دووەم گرنگترین خەڵات بۆ بەرهەمە سینەمایی و تەلەڤزیۆنییەکان لە ئەمریکا لە دوای ئۆسکار هەژمار دەکرێت، براوەکانی ئەو خەڵاتە چانسی زۆریان دەبێت بۆ بردنەوەی خەڵاتی ئۆسکار.

PM:02:06:06/01/2025