ئەمریکا پێکانی فڕۆکە جەنگییەکەی لەلایەن ئێرانەوە رەتدەکاتەوە

‌

وێستگەنیوز- ئارام عەلی


فەرماندەیی ناوەندیی هێزەکانی ئەمریکا (سێنتکۆم) ئەو بانگەشەیەی ئێرانی رەتکردەوە، کە باس لە پێکانی فڕۆکەیەکی جەنگیی ئەمریکی لە جۆری (F-16) دەکات لە ئاسمانی کەنداو و جەخت لەوە دەکاتەوە کە سەرجەم فڕۆکەکانیان سەلامەتن.

فەرماندەیی ناوەندیی ئەمریکا ئەمڕۆ شەممە لە بەیاننامەیەکدا بڵاویکردەوە، ئەو دەنگۆ و بانگەشەیەی سوپای پاسدارانی ئێران سەبارەت بە بەئامانجگرتنی فڕۆکەیەکی جەنگیی جۆری (F-16) دوورە لە راستییەوە و تەواوی فڕۆکەکانیان سەلامەتن.

ئاماژەی بەوەش کردووە، سەرجەم فڕۆکە جەنگییەکانی ئەمریکا لە رۆژهەڵاتی ناوەڕاستدا سەلامەتن و لە دۆخێکی پارێزراودان.

ئەم رەتکردنەوەیە دوای ئەوە دێت کە لە پێشتردا و هەر ئەمڕۆ شەممە، سوپای ئێران لە راگەیەندراوێکدا بانگەشەی ئەوەی کردبوو، دوێنێ لە رێگەی مووشەکێکی بەرگریی ئاسمانییەوە فڕۆکەیەکی جەنگیی ئەمریکیی لە جۆری (F-16) لە ئاسمانی ئاوەکانی کەنداو پێکاوە و زیانی پێگەیاندووە، ئاماژەی بەوەش کردبوو، فڕۆکە پێکراوەکە بە ناچاری لە یەکێک لە فڕۆکەخانە نزیکەکانی ناوچەکەدا نیشتووەتەوە.


PM:06:30:21/11/2026


ئه‌م بابه‌ته 124 جار خوێنراوه‌ته‌وه‌‌



لێرەوە کۆمێنت بنوسە لە فەیسبوک دەردەکەوێت