وەزیری سوپای ئەمریکا دەستی لەکار کێشایەوە

وێستگە نیوز-

رۆژنامەی "وۆڵ ستریت جۆرناڵ" و کۆشکی سپی بڵاویانکردەوە، دان دریسکۆڵ، وەزیری سوپای ویلایەتە یەکگرتووەکانی ئەمریکا، بە فەرمی دەستلەکارکێشانەوەی خۆی پێشکەشی دۆناڵد ترەمپ کردووە و لە رۆژانی داهاتوودا وەزارەتی بەرگری جێدەهێڵێت.

بەپێی زانیارییەکان، ئەم بڕیارەی دریسکۆڵ دوای چەندین مانگ لە گرژی و ئاڵۆزی لەگەڵ پێت هیگسێت، وەزیری بەرگری ئەمریکا دێت، ناکۆکییەکان لەسەر ئاراستەی کارکردنی سوپا و دوورخستنەوەی بەرپرسانی تری باڵای سوپا بووە لەلایەن وەزیری بەرگرییەوە، دریسکۆڵ پێشتر رووبەڕووی رەخنەی زۆر ببووەوە سەبارەت بە توانای ئیدارەدانی بودجەی 185 ملیار دۆلاریی سوپا، بەڵام کۆشکی سپی لە راگەیەندراوێکدا ستایشی سەرکردایەتی ئەو دەکات لە کاتی ئۆپەراسیۆنە سەربازییەکاندا.

ئەم دەستلەکارکێشانەوەیە لە کاتێکدا دێت کە جەنگی ئێران پێی ناوەتە 7ـەم مانگیەوە و سوپای ئەمریکا لە ناوەڕاستی جەنگێکی بەربڵاودایە لە رۆژهەڵاتی ناوەڕاست، ئەم هەنگاوە گومانی لەسەر سەقامگیریی بڕیارە سەربازییەکانی واشنتۆن دروستکردووە، بەتایبەت کە لە ماوەی تەنیا 1 مانگدا 5 بەرپرسی باڵای کۆشکی سپی لە پۆستەکانیان دوورکەوتوونەتەوە یان وازیان هێناوە.

جاک رید، گەورە ئەندامی دیموکراتەکان لە لیژنەی هێزە چەکدارەکانی ئەنجوومەنی پیران، وەزیری بەرگری بە بەرپرسیار لەم دەستلەکارکێشانەوەیە زانی و رایگەیاند کە پێت هیگسێت زیانی بەردەوام بە وەزارەتی بەرگری دەگەیەنێت.

دان دریسکۆڵ کە پێشتر وەک سەرباز لە عێراق خزمەتی کردووە و هاوڕێیەکی نزیکی جەی دی ڤانسی جێگری سەرۆکی ئەمریکایە، لە کاتێکدا دەست لەکاردەکێشێتەوە کە وەزیری بەرگری پێشتریش لە مانگی نیساندا راندی جۆرج، سەرۆک ئەرکانی سوپای لە پۆستەکەی دوورخستبووەوە و تا ئێستا جێگرەوەی بۆ دیاری نەکراوە، ئەمەش سوپای ئەمریکای لە ناوەڕاستی جەنگدا بێ سەرکردایەتییەکی بەردەوام هێشتووەتەوە.

AM:08:42:01/09/2026

ئه‌م بابه‌ته 304 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت