بەهۆی مەترسییە ئەمنییەکانەوە؛ هاتوچۆی تانکەرەکان لە گەرووی هورمز گەیشتە نزمترین ئاست

وێستگەنیوز-

بەرەبەیانی ئەمڕۆ دوشەممە 13ی تەمووزی 2026، ئاژانسی رویتەرز لە راپۆرتێکدا ئاشکرای کرد، کە بەهۆی زیادبوونی گرژی و ئاڵۆزییەکانی نێوان ئەمریکا و ئێران لە ناوچەکە، جوڵەی تانکەرە نەوتەکان لە گەرووی هورمز بە شێوەیەکی بەرچاو کەمی کردووە.

بەپێی داتاکانی دەزگای "کێپلەر" بۆ گواستنەوەی دەریایی، رۆژی یەکشەممە تەنها 6 کەشتی بە گەرووی هورمزدا تێپەڕیون، ئەمەش وەک نزمترین ژمارە لە ماوەی 5 هەفتەی رابردوودا هەژمار دەکرێت. راپۆرتەکە ئاماژەی بەوە کردووە کە دەستپێکردنەوەی هێرشە دوولایەنەکانی نێوان واشنتۆن و تاران لە رۆژهەڵاتی ناوەڕاست، مەترسییە ئەمنییەکانی بۆ سەر رێڕەوە ئاوییەکان زیاتر کردووە.

لە بەشێکی دیکەی داتاکاندا هاتووە، تانکەری زەبەلاحی "هیومانیتی" کە 2 ملیۆن بەرمیل نەوتی ئێرانی هەڵگرتبوو، لەگەڵ تانکەری "کاپتن ئەندریاس" کە نزیکەی 500 هەزار بەرمیل بەرهەمە نەوتییەکانی وڵاتی کوەیتی بارکردبوو، لەو کەشتییانە بوون کە لەو ماوەیەدا گەرووەکەیان تێپەڕاندووە و جێیان هێشتووە.

ئەم پاشەکشە گەورەیە لە جوڵەی کەشتییە نەوتهەڵگرەکان لە کاتێکدایە، کە گەرووی هورمز یەکێکە لە ستراتیجیترین رێڕەوە ئاوییەکانی جیهان بۆ گواستنەوەی وزە.

AM:10:26:13/07/2026

ئه‌م بابه‌ته 96 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت