سوپای کوەیت: بەرپەرچی چەند هێرشێکمان دایەوە

وێستگەنیوز-

بەرەبەیانی ئەمڕۆ چوارشەممە 3ی ئایاری 2026، سەرۆکایەتی ئەرکانی گشتیی سوپای کوەیت رایگەیاند، "سیستەمەکانی بەرگریی ئاسمانی وڵاتەکەمان بەرپەرچی چەند هێرشێکی دوژمنکارانەی داوەتەوە کە بە مووشەک و درۆن ئاسمانی وڵاتەکەی کردبووە ئامانج".

سوپاکە داوای لە هاوڵاتییان و نیشتەجێبووانی کوەیت کردووە پابەندی رێنماییە ئەمنییەکان بن و ئارامی خۆیان بپارێزن، بەڵام سوپای کوەیت لەبارەی سەرچاوەی هێرشەکەوە هیچ زانیارییەکی ئاشکرانەکردووە.

لە لایەکی دیکەوە، عەقید روکن سعود ئەلعەتوان، وتەبێژی وەزارەتی بەرگریی کوەیت، هۆشداریی داوە و داوای لە خەڵک کرد:

1- بە هیچ شێوەیەک لە پاشماوەی مووشەکەکان و پارچە شکاوەکان یان هەر تەنێکی نامۆ نزیک نەکەونەوە.

2- دەست لە پاشماوەی تەقینەوەکان نەدەن بۆ پاراستنی گیانی خۆیان.

3- لە کاتی بینینی هەر تەنێکی گوماناوی، دەستبەجێ پەیوەندی بە لایەنە پەیوەندیدارەکانەوە بکەن.

AM:08:55:03/06/2026

ئه‌م بابه‌ته 440 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت