تەندروستیی جیهانیی سەبارەت بە بڵاوبوونەوەی جۆرێکی کوشندەی ڤایرۆسی ئیبۆلا هۆشداری دەدات
وێستگەنیوز-
بە هۆی بڵاوبونەوەی جۆرێک لە ڤایرۆسی ئیبۆلا کە هیچ ڤاکسین
و چارەسەری بۆ نییە، لانیکەم 87 کەس لە کۆماری کۆنگۆی دیموکراتیک گیانیان لەدەستداوە،
ئەوەش لەکاتێکدایە کە ترسی بڵاوبونەوەی ڤایرۆسی کۆرۆنا لە ناوچەیەکدا هەیە.
رێکخراوی تەندروستیی جیهانی باری نائاسایی بەهۆی بڵاوبوونەوەی
ڤایرۆسی ئیبۆلا لە کۆماری دیموکراتی کۆنگۆ رادەگەیەنێت و هۆشداری لە بڵاوبوونەوەی
زیاتری دەدات. رێکخراوەکە ئاماژەی بەوە کردووە، تا ئێستا نزیکەی 246 حاڵەتی
گوماناوی و 80 گیانلەدەستدان تۆمارکراون، بەڵام روونیکردەوە کە هێشتا ڤایرۆسەکە نەگەیشتووەتە
ئاستی "پەتا جیهانییەکان".
دکتۆر تێدرۆس ئەدهانۆم گێبرێیسوس، بەڕێوەبەری گشتیی رێکخراوی
تەندروستیی جیهانی هۆشداری دا کە گومان و نادڵنیایی زۆر هەیە لەبارەی ژمارەی راستی
تووشبووان و شوێنەکانی بڵاوبوونەوەی ڤایرۆسەکە.
بەگوێرەی زانیارییەکانی رێکخراوەکە، ئەم جۆرەی ئێستای ئیبۆلا
بەهۆی ڤایرۆسی "بوندیبوگیۆ"وەیە، کە تا ئێستا هیچ دەرمان یان ڤاکسینێکی
پەسندکراوی بۆ نەدۆزراوەتەوە.
هەروەها ئاماژە بەوە دراوە کە ڤایرۆسەکە سنووری کۆنگۆی بەزاندووە
و گەیشتووەتە وڵاتی ئۆگەندا، لەوێش 2 حاڵەتی تووشبوون پشتڕاستکراونەتەوە و یەکێکیان
کە پیاوێکی تەمەن 59 ساڵ بووە، رۆژی پێنجشەممە گیانی لەدەستداوە.
رێکخراوەکە داوا لە کۆنگۆ و ئۆگەندا دەکات ناوەندی باری
نائاسایی بۆ چاودێریکردن و رێگری لە بڵاوبوونەوەی ڤایرۆسەکە دابمەزرێنن، بەڵام جەخت
دەکاتەوە کە نابێت وڵاتانی دیکە سنوورەکانیان دابخەن یان گەشت و بازرگانی قەدەخە
بکەن، چونکە ئەو رێکارانە لە ترسەوە سەرچاوە دەگرن و بنەمای زانستییان نییە.
ڤایرۆسی ئیبۆلا بۆ یەکەمجار لە ساڵی 1976 لە کۆنگۆ دۆزرایەوە
و پێدەچێت لە شەمشەمەکوێرەوە بۆ مرۆڤ گوێزرابێتەوە. ئەمە 17یەمین جارە ئەم ڤایرۆسە
کوشندەیە لەو وڵاتەدا بڵاودەبێتەوە.
AM:09:13:17/05/2026
ئهم بابهته 256
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت