پوتین بۆ شەرع: مۆسکۆ هەمیشە پشتیوانی گێڕانەوەی سەروەری و یەکپارچەیی خاکی سوریا دەکات

وێستگەنیوز-

ئەمڕۆ چوارشەممە 28ی کانونی دووەمی 2026، ئەحمەد شەرع، سەرۆک سوریا گەیشتە مۆسکۆ و لەگەڵ ڤلادیمیر پووتین، سەرۆکی رووسیا کۆبووەوە.

بەپێی راگەیەندراوی کۆبوونەوەکە بێت، لە میانی کۆبوونەوەکەدا سەرۆکی رووسیا پیرۆزبایی خێرابوونی پڕۆسەی یەکخستنەوەی سوریای کرد و جەختی کردەوە، "مۆسکۆ هەمیشە پشتیوانی گێڕانەوەی سەروەری و یەکپارچەیی خاکی ئەو وڵاتە بووە و دەمێنێتەوە".

پوتین رایگەیاند، "گێڕانەوەی ناوچەکانی فورات هەنگاوێکی ستراتیژی و گرنگە بۆ ئایندەی سوریا و دەبێتە کلیلی گەڕانەوەی شکۆ و سەقامگیریی هەمیشەیی بۆ سەرانسەری وڵاتەکە".

ئەحمەد شەرع ستایشی هەڵوێستەکانی رووسیای کرد کە پشتیوانی یەکپارچەیی خاکی وڵاتەکەی کرد و ئاماژەی بەوەدا، "توانیومانە بەسەر کۆسپە گەورەکاندا بەسەرکەوتوویی سەربکەوین".

ئەحمەد شەرع سەردانەکەی بۆ مۆسکۆ بە قۆناغێکی نوێی پەیوەندییەکان ناوبرد و رووسیاش ئامادەیی خۆی نیشان دا بۆ پەرەپێدانی هاوکارییەکان لە سەرجەم بوارە ئابووری و سەربازییەکاندا.

هەروەها رووسیا ئامادەیی تەواوی نیشاندا بۆ بەشداری لە ئاوەدانکردنەوەی سوریا لە ڕێگەی کۆمپانیاکانی بیناسازییەوە، هاوکات هەردوولا جەختیان لە بەرزکردنەوەی ئاستی هاوکارییە ئابوورییەکان و پاراستنی دەستکەوتە بازرگانییەکان کردەوە.

PM:05:24:28/01/2026

ئه‌م بابه‌ته 156 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت