وەزیری بەرگریی ئیسرائیل: ئەبو عوبەیدە کوژرا
وێستگەنیوز_
یسرائیل کاتز، وەزیری بەرگریی ئیسرائیل رایگەیاند، ئەبو عوبەیدە، وتەبێژی باڵی سەربازیی حەماس لەلایەن هێزە ئەمنییەکانەوە کوژرا.
ئەمڕۆ یەکشەممە، 31ـی 8ـی 2025، یسرائیل کاتز لە ئێکس رایگەیاند: "ئەبو عوبەیدە، وتەبێژی حەماسی تیرۆریست لە غەززە کوژراوە" و پیرۆزبایی لە هێزە ئەمنییەکانی وڵاتەکەی کرد.
پێشتر لە پێشنیوەڕۆی ئەمڕۆ، بنیامین نەتەنیاهو، سەرۆک وەزیرانی ئیسرائیل رایگەیاند، ئەبو عوبەیدە رۆژی شەممە لە غەززە بە ئامانج گیرا، بەڵام ئاماژەی بە کوشتنی نەدا.
ئەبو عوبەیدە 'رووخسارە دەمامکدارەکە'ی باڵی سەربازیی حەماس لە ساڵی 2007ـەوە، واتە 18 ساڵە لە راگەیەندراوە ڤیدیۆیی و دەنگییەکاندا دەردەکەوێت، بەڵام ناسنامە و شێوەی راستەقینەی بە نهێنی ماوەتەوە. هەمیشە دەمامکێکی سوور (کوفیەی فەلەستینی) دەبەستێت کە تەنیا چاوەکانی دیارن. ئەم دەمامکە دوو ئامانجی هەیە؛ یەکەم هۆکاری ئەمنی: بۆ پاراستنی ناسنامەکەی لە دەزگا هەواڵگرییەکانی ئیسرائیل، دووەمیش بووەتە هێمایەک بۆ "بەرخودانی چەکداری" و نوێنەرایەتیی هەموو چەکدارانی قەسام دەکات، نەک تەنیا یەک کەس.
ئەبو عوبەیدە تەنیا وتەبێژێکی ئاسایی نییە، بەڵکو بەشێکی سەرەکییە لە شەڕی دەروونی و میدیایی حەماس دژی ئیسرائیل. وتارەکانی، کە زۆربەی کات لە کاتی شەڕ و پێکدادانەکاندا بڵاودەکرێنەوە، چەند ئامانجێکیان هەیە:
بڵاوکردنەوەی زانیاریی سەربازی: راگەیاندنی ئۆپەراسیۆنەکان و زیانەکانی لایەنی ئیسرائیلی لە روانگەی حەماسەوە.
هەڕەشەکردن: ئاراستەکردنی پەیامی هەڕەشەئامێز بۆ سەرکردەکانی ئیسرائیل.
بەرزکردنەوەی ورەی لایەنگران: دڵنیاییدان بە فەلەستینییەکان و لایەنگرانی حەماس لەبارەی "سەرکەوتنەکان".
هەروەها سەرباری نهێنیبوونی، دەزگا هەواڵگرییەکانی ئیسرائیل بانگەشەی ئەوە دەکەن ناسنامەی راستەقینەیان ئاشکرا کردووە. پێیان وایە ناوی راستەقینەی "حوزەیفە سەمیر عەبدوڵڵا کەحلووت"ـە و خەڵکی کەمپی جەبالیایە لە کەرتی غەززە لە ساڵی 1985 لە کەمپی جەبالیا لە باکووری کەرتی غەززە لە دایکبووە.
PM:04:41:31/08/2025
ئه‌م بابه‌ته 832
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت