حوسییه‌كان كوژرانی سه‌رۆك وه‌زیرانی حكومه‌ته‌كه‌یان و ژماره‌یه‌ك وه‌زیریان له‌لایه‌ن ئیسرائیله‌وه راگه‌یاند
وێستگه‌نیوز-
حوسییه‌كانی یه‌مه‌ن به‌فه‌رمی كوژرانی ئه‌حمه‌د غالب ره‌هه‌وی سه‌رۆك وه‌زیرانی حكومه‌ته‌كه‌یان و ژماره‌یه‌ك له وه‌زیره‌كانیان له هێرشێكی ئیسرائیلدا بۆسه‌ر سه‌نعای پایته‌خت راگه‌یاند.
ئه‌مڕۆ شه‌ممه حوسییه‌كان به فه‌رمی كوژرانی ئه‌حمه‌د غالب ره‌هه‌وی سه‌رۆكی حكومه‌ته‌كه‌یان (له‌لایه‌ن كۆمه‌ڵگه‌ی نێوده‌وڵه‌تییه‌وه دانی پێدانه‌نراوه) و چه‌ند وه‌زیرێكیان له هێرشه ئاسمانییه‌كه‌ی رۆژی پێنجشه‌ممه‌ی رابردووی ئیسرائیل بۆ سه‌ر شاری سه‌نعای پایته‌ختی یه‌مه‌ن راگه‌یاند.
ئه‌و گرووپه له راگه‌یه‌ندراوێكدا ئاماژه‌ی به‌وه‌دا كه له وۆرك شۆپێكی رۆتینی كه له‌لایه‌ن حكومه‌ته‌وه بۆ هه‌ڵسه‌نگاندنی چالاكییه‌كانی و ئه‌دای كاركردنی له ماوه‌ی ساڵی رابردوودا به‌ڕێوه‌چوو، له شاری سه‌نعای پایته‌خت، ئیسرائیل سه‌رۆك وه‌زیران و ژماره‌یه‌ك وه‌زیری كرده ئامانج.
ئه‌وه‌شی خستۆته‌ڕوو كه "ژماره‌یه‌ك وه‌زیر برینداربوون كه برینێكی به‌شێكیان سه‌خته و له‌ژێر چاودێری پزیشكیدان"، به‌بێ ئه‌وه‌ی ژماره‌یان ئاشكرا بكات.
لای خۆیه‌وه كه‌ناڵه‌كانی ئه‌لعه‌ره‌بیه و ئه‌لحه‌ده‌سی سعودیه له زاری په‌یامنێره‌كانیانه‌وه باسیان له گیانله‌ده‌ستدانی دوو جێگری سه‌رۆك وه‌زیرانی حوسییه‌كان كه بریتین له هاشم ئه‌حمه‌د شه‌ره‌ف ئه‌لدین وه‌زیری راگه‌یاندن و حه‌سه‌ن عه‌بدوڵا یه‌حیا ئه‌لسه‌عدی وه‌زیری په‌روه‌رده كرد سه‌ره‌ڕای برینداربوونی بریكاری وه‌زیری ناوخۆ.
حوسییه‌كان راشیانگه‌یاند كه محه‌مه‌د ئه‌حمه‌د میفتاح وه‌ك سه‌رۆك وه‌زیران به وه‌كاله‌ت ده‌ستنیشان ده‌كرێت.
جه‌ختیشیان له‌وه كرده‌وه كه به‌رده‌وام ده‌بن له رووبه‌ڕووبوونه‌وه‌ی ئیسرائیل، "بۆ پشتیوانی له گه‌لی فه‌له‌ستین له غه‌ززه"، وه‌ك خۆیان ده‌ڵێن.
PM:06:04:30/08/2025
ئه‌م بابه‌ته 360
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت