ئه‌وروپا سزاكانی سه‌ر ئێران چالاك ده‌كاته‌وه و ئه‌مریكاش پێشوازی لێده‌كات
وێستگه‌نیوز-
ترۆیكای ئه‌وروپی كه پێكهاتوه له وڵاتانی فه‌ره‌نسا، ئه‌ڵمانیا و به‌ریتانیا، ئه‌مڕۆ پرۆسه‌یه‌كی ده‌ستپێكردوه بۆ دوباره سه‌پاندنه‌وه‌ی سزاكان به‌سه‌ر ئێراندا، ویلایه‌ته یه‌كگرتووه‌كانی ئه‌مریكاش پێشوازی له‌و بڕیاره‌ی وڵاتانی ئه‌وروپی ده‌كات.
ئه‌مڕۆ پێنجشه‌ممه ئاژانسی رۆیته‌رز بڵاویكرده‌وه كه ترۆیكای ئه‌وروپا پرۆسه‌ی كاراكردنه‌وه‌ی سزاكانی سه‌ر ئێرانی ده‌سپێكردوه‌ته‌وه و سێ وڵاته‌كه "هه‌وڵده‌ده‌ن له ماوه‌ی 30 رۆژی داهاتودا كێشه هه‌ڵپه‌سێردراوه‌كانیان له‌گه‌ڵ ئێران چاره‌سه‌ر بكه‌ن".
به‌گوێره‌ی رۆیته‌رز، وڵاتانی فه‌ره‌نسا، ئه‌ڵمانیا و به‌ریتانیا به‌رده‌وام ده‌بن له گفتوگۆكردن له‌گه‌ڵ ئێران سه‌باره‌ت به پێشنیاری درێژكردنه‌وه‌ی بڕیارنامه‌ی ڕێككه‌وتننامه‌ی ئه‌تۆمی ساڵی 2015 و داوایان له ئێران كردوه كه "به‌شداری له دیپلۆماسییه‌كی بنیاتنه‌ردا بكات بۆ نه‌هێشتنی نیگه‌رانییه‌كان سه‌باره‌ت به پڕۆگرامه ئه‌تۆمییه‌كه‌ی".
لای خۆیه‌وه ماركۆ روبیۆ، وه‌زیری ده‌ره‌وه‌ی ئه‌مریكا رایگه‌یاند كه پێشوازی له بڕیاره‌كه‌ی فه‌ره‌نسا، به‌ریتانیا و ئه‌ڵمانیا بۆ كاراكردنی میكانیزمی "سناپ باك " سه‌پاندنه‌وه‌ی سزا له دژی ئێران ده‌كه‌ن، ده‌شڵێت: "واشنتۆن ئاماده‌یه له‌سه‌ر به‌رنامه‌ی ئه‌تۆمیی ئێران، گفتوگۆی راسته‌وخۆ له‌گه‌ڵ تاران بكات".
روبیۆ وتی: "داوا له سه‌ركرده‌كانی ئێران ده‌كه‌ین هه‌نگاوی به‌په‌له‌ی پێویست بنێن بۆ دڵنیابوونه‌وه له‌وه‌ی وڵاته‌كه‌یان هه‌رگیز چه‌كی ئه‌تۆمی به‌ده‌ست ناهێنێت، بۆ ئه‌وه‌ی به رێگه‌ی ئاشتیدا بڕوات و له ئه‌نجامدا خۆشگوزه‌رانی بۆ خه‌ڵكی ئێران به‌ده‌ست بێنێت".
له یه‌كه‌م كاردانه‌وه‌شدا به‌رپرسێكی باڵای ئێران به رۆیته‌رزی وت كه "هه‌نگاوی سێ وڵاته ئه‌وروپییه‌كه دژی دیپلۆماسییه و ده‌رفه‌تێك نییه بۆی. میكانیزمی دوباره سه‌پاندنی سزاكان نایاسایی و جێی داخه".
PM:11:49:28/08/2025
ئه‌م بابه‌ته 192
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت