ناتانیاهۆ: كارده‌كه‌ین بۆ دروستكردنی ناوچه‌یه‌كی له چه‌ك داماڵراو له سوریا
وێستگه‌نیوز-
ئه‌مڕۆ پێنجشه‌ممه میدیاكانی ئیسرائیل بڵاویان كرده‌وه گه بنیامین ناتانیاهۆ، سه‌رۆك وه‌زیرانی ئیسرائیل كارده‌كات بۆ دروستكردنی ناوچه‌یه‌كی له چه‌ك داماڵراو له به‌رزاییه‌كانی جۆلانه‌وه تا شاری سوه‌یدا له باشووری سوریا.
رۆژنامه‌ی یه‌دیعۆت ئه‌حرۆنۆت له زاری ناتانیاهۆوه رایگه‌یاند كه "گفتوگۆكان به‌رده‌وامن بۆ پاراستنی دروزه‌كان له سوریا و دروستكردنی ناوچه‌یه‌كی له چه‌ك داماڵراو و رێڕه‌وێكی مرۆیی بۆ گه‌یاندنی هاوكاری بۆ شاری سوه‌یدا.
ئه‌و وتانه‌ی ناتانیاهۆ له‌میانی سه‌ردانه‌كه‌یدا بۆ گوندێكی باكوری ئیسرائیل هات كه له‌وێ له‌گه‌ڵ سه‌ركرده‌ی ڕۆحی پێكهاته‌ی دروزه‌كان له ئیسرائیل، شێخ موه‌فه‌ق ته‌ریف و ژماره‌یه‌ك له سه‌ركرده‌كانی دیكه‌ی دروز كۆبووه‌وه.
سه‌رۆك وه‌زیرانی ئیسرائیل به‌ڵێنه‌كه‌ی بۆ پشتیوانیكردنی دروزه‌كان له سوریا دووپاتكرده‌وه و دڵنیای كردنه‌وه كه "لێكتێگه‌یشتنه‌كان له‌گه‌ڵ حكومه‌تی ئه‌حمه‌د ئه‌لشه‌رع له‌سه‌ر حیسابی ئه‌وان نابێت".
ئه‌م كۆبوونه‌وه‌یه له به‌ناو "ژووری ئۆپه‌راسیۆنه‌كان" له گوندی جولس له ناوچه‌ی جه‌لیل به‌ڕێوه‌چوو. ئه‌م ژووره له‌لایه‌ن ژماره‌یه‌ك ئه‌فسه‌ری سوپای ئیسرائیل له پێكهاته‌ی دروز دامه‌زراوه كه له ماوه‌ی دوو مانگی رابردوودا جه‌نگاوه‌ر و چه‌ك و یارمه‌تی مرۆیی بۆ شاری سوه‌یدا ناردووه و به‌پێی شێوازی كاركردنی سوپای ئیسرائیل له كاتی جه‌نگدا كارده‌كات.
PM:10:09:28/08/2025
ئه‌م بابه‌ته 256
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت