ترەمپ دەیەوێت ناوی وەزارەتی بەرگری ئەمریکا بکاتەوە بە هەمان ناوی ساڵانی دوای جەنگی جیهانی دووەم
وێستگەنیوز_
دۆناڵد ترەمپ، سەرۆکی ئەمریکا دەڵێت، دەیەوێت ناوی وەزارەتی بەرگریی وڵاتەکەی بکاتە وەزارەتی جەنگ. دەشڵێت، ئەو هەنگاوە ئاماژەیەکی بەهێزتری بۆ ئەمریکا دەبێت.
دۆناڵد ترەمپ لە کۆشکی سپی بە رۆژنامەنووسانی راگەیاند، "دەکرێت لە چەند هەفتەی داهاتوودا ناوی وەزارەتی بەرگریی بکەمە وەزارەتی جەنگ، لەوانەیە ئەو هەنگاوە پێویست بە رەزامەندیی کۆنگرێس نەکات و خۆمان راستەوخۆ جێبەجێی بکەین."
هەروەها ئاماژەی بەوەشکرد، "کاتێک لە جەنگی یەکەمی جیهانی و جەنگی دووەمی جیهانیدا سەرکەوتین، وەزارەتەکە ناوی وەزارەتی جەنگ بوو. بە بۆچوونی من، ئەوە ئەرکە سەرەکییەکەیەتی (نەوەک پاراستنی ئاشتی و شتی هاوشێوە)."
وتیشی: هەموو کەس حەزی بەو مێژووە سەرکەوتوو و باوەڕپێنەکراوەیە کە وەزارەتی جەنگ هەیبووە، بەڵام دواتر ناوەکەی کرایە وەزارەتی بەرگری.
سەرۆکی ئەمریکا باسی لەوەشکرد، "بەرگری؟ ئێمە بەرگری لەچی دەکەین؟ ئەوە پێشتر پێی دەوترا وەزارەتی جەنگ و مانایەکی بەهێزتری هەبوو."
دوای جەنگی دووەمی جیهانی و لە ساڵی 1947ـدا، کۆنگرێسی ئەمریکا پڕۆژەیەکی ئەنجوومەنی ئاسایشی وڵاتەکەی بە پاڵپشتیی هاری تروومان، سەرۆکی ئەوکاتی وڵاتەکەی بۆ گۆڕینی وەزارەتی جەنگی ئەمریکا بۆ وەزارەتی بەرگری پەسند کرد. وەزارەتی جەنگ لە ساڵی 1789 دامەزرا.
AM:09:25:27/08/2025
ئه‌م بابه‌ته 444
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت