هەسەدە و سوپای نیشتیمانی لە سوریا دەستیان بە ئاڵوگۆڕکردنی دیلەکان کرد

وێستگەنیوز-

هێزەکانی سوریای دیموکرات "هەسەدە" و هێزەکانی سەر بە حکومەتی کاتی سوریا دەستیان کرد بە پڕۆسەی ئاڵوگۆڕکردنی دیلەکان.

ئەمڕۆ پێنجشەممە 3ی نیسانی 2025، دەستکرا بە جێبەجێکردنی رێککەوتنی نێوان هەسەدە و هێزەکانی سەر بە دیمەشق، سەبارەت بە ئازادکردنی 250 دیل کە 150یان شەڕڤانی هەسەدەن و ئەوانیتریش چەکداری سەر بە حکومەتى دیمەشقن.

روانگەی سوری بۆ مافەکانی مرۆڤ رایگەیاندووە، "زیاتر لە 200 دەستگیرکراو لە نێوان هەسەدە و حکومەتی کاتی دیمشق ئاڵوگۆڕ دەکرێن، ئەمەش دوای رێککەوتنی نێوانیان کە رۆژی سێشەممەی رابردوو واژوی لەسەرکراوە".

ئاماژە بەوەکراوە، هەسەدە 40 تەرمی شەڕڤانانی خۆی لە هێزەکانی سوریا وەردەگرێتەوە، بەرامبەر بە ئازادکردنی 25 دیل کە لەنێوانیاندا چوار تورک هەن.

ئەمەش لەکاتێکدایە، ئێستا ئاگربەستی راگرتنی شەڕ لە نێوانیاندا هەیە، لە 12ی کانونی یەکەمی 2024ەوە شەڕ لە نێوان هەسەدە و سوپای نیشتیمانیی سەر بە تورکیا دروستبووە.

PM:05:57:03/04/2025

ئه‌م بابه‌ته 280 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت