16 کەس بە تۆمەتی بایکۆتکردنی کڕینی کاڵای تورکی لە لایەن هێزە ئەمنییەکانی ئیستەنبوڵەوە دەستگیرکران
وێستگەنیوز_
شەوی رابردوو 16 کەس بە تۆمەتی بایکۆتکردنی کڕینی کاڵای تورکی لە لایەن هێزە ئەمنییەکانی ئیستەنبوڵەوە دەستگیرکران.
بە ئامانجی پشتیوانیی لە ئەکرەم ئیمامئۆغڵو، سەرۆکی دەستگیرکراوی گەورە شارەوانیی ئیستەنبوڵ، هەڵمەتێکی بایکۆتکردنی کڕینی کاڵا و براندەکان لە تورکیا بەڕێوەچوو.
بە گوێرەی زانیاریی میدیاکانی تورکیا، درەنگانی شەوی چوارشەممە، 2ـی 4ـی 2025، بەتۆمەتی بانگەشەکردن بۆ بایکۆتکردنی کاڵاکان لەسەر تۆڕە کۆمەڵایەتییەکان، 16 کەس لە ئیستەنبوڵ دەستگیرکراون.
تۆڕی دەستپێشخەری دەنگی پارێزەران کە لە ژمارەیەک پارێزەر پێکهاتوون ڕایگەیاندووە، هێزە ئەمنییەکان لیستێکیان بۆ دەستبەسەرکردنی 16 کەسی دیکە ئامادە کردووە و پێشبینی دەکات ژمارەی دەستبەسەرکراوان زیاد بکات. ئاشکراشی کردووە، ئەوانەی دەستبەسەرکراون بە تۆمەتی تێکدانی ئابووری تورکیا دادگایی دەکرێن.
ئۆزگور ئۆزەل، سەرۆکی جەهەپە پشتیوانیی خۆی بۆ بایکۆت دووپات کردەوە و بە "مافێکی دیموکراسی" ناوی برد.
لە بەرامبەردا، عەلی یەریلکەیاش، وەزیری ناوخۆی تورکیا ڕایگەیاندووە "بانگەوازی بایکۆت، تێکدانی سەربەخۆیی ئابووریمانە و هەوڵی کودەتایە لە دژی ئابووریی تورکیا."
عومەر چەلیک، وتەبێژی ئاکپارتیش دەڵێت: "چی دیکە جەهەپە ئۆپۆزسیۆنێکی سیاسی نییە، بەڵکو هەڕەشەیەکی تەواوەتییە بۆ سەر تورکیا. ئەو چالاکییانەی ئۆزگور ئۆزەل بەڕێوەیان دەبات."
PM:02:47:03/04/2025
ئه‌م بابه‌ته 432
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت