تره‌مپ به‌ڵێنی گه‌ڕانه‌وه‌ی سه‌رده‌می زێڕینی ئه‌مریكای له‌ڕێی سه‌پاندنی باجه‌كانه‌وه دا
وێستگه‌نیوز-
سه‌رۆكی ویلایه‌ته یه‌كگرتووه‌كانی ئه‌مریكا به‌ڵێنی گه‌ڕانه‌وه‌ی سه‌رده‌می زێڕینی وڵاته‌كه‌ی له‌ڕێی سه‌پاندنی باجه‌كانه‌وه دا و ده‌ڵێت: "چیتر رێگه ناده‌ین هیچ وڵاتێك سامانی وڵاته‌كه‌مان بدزێت و باج به‌سه‌ر ته‌واویی وڵاتان ده‌سه‌پێنین".
رۆژی چواشه‌ممه 2ی نیسانی 2025، دۆناڵد تره‌مپ، سه‌رۆكی ئه‌مریكا له كۆشكی سپی، له لێدوانێكدا ئاشكرایكرد كه فه‌رمانێكی مێژووی ئیمزا ده‌كات بۆ ئه‌وه‌ی باج به‌سه‌ر ته‌واویی ئه‌و وڵاتانه‌ی جیهاندا بسه‌پێنێت كه باجیان به‌سه‌ر ئه‌مریكادا سه‌پاندووه.
تره‌مپ وتی: "ئه‌مه یه‌كێكه له گرنگترین رۆژه‌كان له مێژووی ئه‌مریكادا، ئه‌مه سه‌رده‌می زێڕینی ئه‌مریكا و رۆژی سه‌ربه‌خۆی ئابووری ئه‌مریكایه".
ئاماژه‌شی به‌وه‌دا كه "كاتی ئه‌وه هاتووه جارێكی دیكه وڵات ببوژێته‌وه و باجه‌كان جارێكی دیكه ئه‌مریكا گه‌وره ده‌كه‌نه‌وه".
وتیشی: "هه‌ركه‌سێك باجی گومرگی به‌سه‌ر ئێمه‌دا بسه‌پێنێت، باجی هاوشێوه‌ی به‌سه‌ردا ده‌سه‌پێنین".
ئاشكراشیكرد كه به ڕێژه‌ی سه‌دا 10 باج به‌سه‌ر هه‌موو كه‌لوپه‌له هاورده‌كان ده‌سه‌پێنێت، هه‌روه‌ها به ڕێژه‌ی سه‌دا 25 باج به‌سه‌ر ئه‌و ئۆتۆمبێلانه ده‌سه‌پێنێت كه له ده‌ره‌وه‌ی ئه‌مریكا دروست ده‌كرێن.
ئه‌وه‌شی خسته‌ڕوو كه "ئه‌وروپا هیچ به‌رهه‌مێكی ئه‌مریكا هاورده ناكات، بۆیه به ڕێژه‌ی سه‌دا 20 باج به‌سه‌ر ئه‌وروپا ده‌سه‌پێنین و چیتر رێگه ناده‌ین هیچ وڵاتێك سامانی وڵاته‌كه‌مان تاڵان بكات".
تره‌مپ كه یه‌كێك له ملیاردێره‌كانی ئه‌مریكا و جیهانه، هێرشێكی توندی كرده سه‌ر هه‌موو هاوبه‌شه بازرگانییه‌كانی وڵاته‌كه‌ی و رایگه‌یاند كه "ئه‌وان ده‌یان ساڵه ئه‌مریكایان له رووی ئابوورییه‌وه قۆستۆته‌وه به سه‌پاندنی باجی زیاده‌ڕۆیی به‌سه‌ر هه‌نارده‌كردنی وڵاته‌كه‌یدا".
AM:12:07:03/04/2025
ئه‌م بابه‌ته 348
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت