سوپای ئیسرائیل دیمه‌شق و حه‌مای بۆردوومان كرد
وێستگه‌نیوز-
میدیاكانی سوریا بڵاویان كرده‌وه كه ئه‌مشه‌و هێزی ئاسمانی ئیسرائیل زنجیره‌یه‌ك هێرشی كرده‌سه‌ر چه‌ند ناوچه‌یه‌كی سوریا به تایبه‌تی فڕۆكه‌خانه‌ی تی فۆڕ و حه‌مای سه‌ربازی و چه‌ند شوێنێكی تری ستراتیژی.
به‌گوێره‌ی میدیاكانی سوریا، فڕۆكه‌كانی ئیسرائیل زنجیره‌یه‌ك هێرشی ئاسمانییان له سوریا ئه‌نجام دا و به تایبه‌تی ده‌وروبه‌ری ناوه‌ندێكی توێژینه‌وه‌ی زانستییان له باكوری دیمه‌شق و نزیك شاری حه‌ما كرده ئامانج.
ئاژانسی سانا بڵاویكرده‌وه كه هێرشێكی ئاسمانی ئیسرائیل ده‌وروبه‌ری بینای توێژینه‌وه‌ی زانستی له گه‌ڕه‌كی بارزه‌ی دیمه‌شقی پایته‌خت كرده ئامانج.
ئاژانسه‌كه ده‌ڵێت كه هاوكات هێرشێكی ئاسمانی ئیسرائیل له ده‌وروبه‌ری حه‌ما ئه‌نجامدراوه.
لای خۆیه‌وه سوپای ئیسرائیل هێرشكردنه‌سه‌ر بنكه سه‌ربازییه‌كانی سوریا و ژێرخانه سه‌ربازییه‌كانی دیكه‌ی له دیمه‌شق پشتڕاستكرده‌وه.
ئه‌فیخای ئه‌دره‌عی وته‌بێژی سوپای ئیسرائیل، له پلاتفۆرمی "X"ه‌وه رایگه‌یاند كه سوپا توانا سه‌ربازییه‌كانی سوریای له بنكه‌كانی حه‌ما و T4 له حومس بۆردوومان كردووه و هێرشه‌كان به‌رده‌وام ده‌بن بۆ نه‌هێرشتنی هیچ هه‌ڕه‌شه‌یه‌ك بۆ سه‌ر ئیسرائیل".
كه‌ناڵه‌كانی ئه‌لعه‌ره‌بیه/ئه‌لحه‌ده‌س"ی سعودی له زاری سه‌رچاوه‌كانیانه‌وه بڵاویانكرده‌وه كه 12 هێرش كراوه‌ته‌سه‌ر فڕۆكه‌خانه‌ی سه‌ربازی حه‌ما له سوریا، ئاماژه‌شی به‌وه‌دا كه له ئه‌نجامی هێرشه‌كه‌ی ئیسرائیل چه‌ند كه‌سێك بریندار بوون.
ئه‌وه‌شی خسته‌ڕوو كه هێرشه‌كانی ئیسرائیل فڕۆكه جه‌نگییه‌كانی فڕۆكه‌خانه‌ی سه‌ربازی حه‌مایان كردووه‌ته ئامانج.
سه‌رچاوه‌كان هه‌روه‌ها ڕایانگه‌یاند كه هێرشێكی ئیسرائیلی له ده‌وروبه‌ری فڕۆكه‌خانه‌ی سه‌ربازی T4 له لادێكانی حومس ئه‌نجام دراوه.
هاوكات رۆژنامه‌ی "ئۆرشه‌لیم پۆست" له زاری به‌رپرسێكی ئیسرائیلییه‌وه بڵاویكرده‌وه كه "هێرشه‌كانی ئه‌مشه‌ومان په‌یامێكه بۆ توركیا كه هیچ بنكه‌یه‌كی سه‌ربازی له سوریا دانه‌مه‌زرێنێت و ده‌ستوه‌ردان له چالاكییه‌كانمان نه‌كات".
PM:11:35:02/04/2025
ئه‌م بابه‌ته 240
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت