لە ئەنجامی هێرشێکی گرووپە چەکدارەکان زیاتر لە 500 زیندانیی لە هایتی هەڵاتن
لە ئەنجامی هێرشێکی گرووپە چەکدارەکان، زیاتر 500 زیندانیی لە زیندانی مێربالیس کە دەکەوێتە باکووری پۆرت ئۆ پرێنسی پایتەختی هایتی هەڵاتن.
ئەمرۆ چوارشەممە 2ـی 4ـی 2025، فرێدریک ئۆسیان، نوێنەری حکومەت لە ناوچەکە رایگەیاندووە، هێرشەکەی دوو شەوی ڕابردوو؛ هەریەک لە بنکەی پۆلیس و زیندانەکە لەلایەن گرووپە چەکدارەکان کراونەتە ئامانج، لە ئەنجامدا 529 زیندانی هەڵاتوون.
بە وتەی ئەو بەرپرسە، بنکەی پۆلیسەکە کارمەندی کەمی تێدابووە، بۆیە ئەوانیش لە بنکەکە هەڵاتوون و چۆڵیان کردووە، ئەمەش ڕێگەی بە چەکدارەکان داوە زیندانییەکان ئازاد بکەن.
ئاشکراشی کردووە، چەکدارەکان شارەکەیان وێرانکردووە، کوژراو و بریندار لەنێو دانیشتووانانی شارەکەدا هەیە، لەکۆی 100 هەزار دانیشتووانی شاری مێربالیس، بە هەزارانیان ڕوویان لە شارۆچکەکانی دراوسێ کردووە، ئەمەش لەکاتێکدایە تاوەکو ئێستا شەڕی چەکداری لە شارەکەدا لەنێوان گرووپە چەکدارەکان و هێزە ئەمنییەکان بەردەوامە.
ئۆسیان جەختیشی کردەوە، چەکدارەکان دەستیان بەسەر قوتابخانەی ئامادەیی گشتی ناوچەکەدا گرتووە، دۆخەکە زۆر ئاڵۆزە، ئێمە لە مەترسیی لەدەستدانی کۆنترۆڵی شارەکەداین.
هایتی، وڵاتێکی هەژارنیشینی کاریبیە، بەدەست توندوتیژیی گرووپە چەکدارەکان و ناسەقامگیری سیاسییەوە گیرۆدەیە و خراپی دۆخی ئابووری دانیشتوانەکەشی هێندەی دیکە دۆخی ژیانکردنی قورستر کردووە.
AM:11:32:02/04/2025
ئه‌م بابه‌ته 328
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت