ئه‌ربیل یه‌هود كێیه كه ناكۆكی له‌نێوان ئیسرائیل و حه‌ماس دروست كردووه؟
ئه‌ربیل یه‌هود
وێستگه‌نیوز-
دوای ئه‌وه‌ی ئیسرائیل ناڕه‌زایی ده‌ربڕی له راده‌ستكردنی ژماره‌یه‌ك بارمته، به‌بێ ئه‌وه‌ی ئه‌ربیل یه‌هود له‌نێویاندا بێت، ناكۆكی له‌سه‌ر رێككه‌وتنی ئاگربه‌ست و ئاڵوگۆڕی دیله‌كانی نێوان ئیسرائیل و حه‌ماس دروست بووه كه هه‌ڕه‌شه له به‌رده‌وامی جێبه‌جێكردنی بڕگه‌كانی رێكه‌وتنه‌كه ده‌كات.
وه‌ك به‌شێك له رێككه‌وتنی ئاڵوگۆڕی نێوانیان، ئه‌مڕۆ شه‌ممه، خاچی سوور چوار ژنه بارمته‌ی ئیسرائیلی له بزووتنه‌وه‌ی حه‌ماسی فه‌له‌ستینی وه‌رگرت.
دانیال هاگاری وته‌بێژی سوپای ئیسرائیل وتی: "حه‌ماس پابه‌ند نه‌بووه به رێككه‌وتنی ئاڵوگۆڕی دیله‌كان".
لای خۆیه‌وه نووسینگه‌ی بنیامین ناتانیاهۆ، سه‌رۆك وه‌زیرانی ئیسرائیل ڕایگه‌یاندووه، ئیسرائیل رێگه به گه‌ڕانه‌وه‌ی دانیشتوان بۆ به‌شی باكووری كه‌رتی غه‌ززه نادات، تا ئه‌و كاته‌ی ئه‌ربیل یه‌هود ئازاد ده‌كرێت.
له‌به‌رامبه‌ردا حه‌ماس دووپاتی كرده‌وه كه نێوه‌ندگیرانی ئاگادار كردۆته‌وه كه ئه‌ربیل یه‌هود له ژیاندایه و باری ته‌ندروستی باشه و شه‌ممه‌ی داهاتوو ئازاد ده‌كرێت.
دوای لێدوانه‌كه‌ی حه‌ماس، كه‌ناڵی 12ی ئیسرائیلی بڵاویكرده‌وه كه ته‌لئه‌بیب "داوای به‌ڵگه ده‌كات كه ئه‌ربێل یه‌هود له ژیاندایه و هه‌فته‌ی داهاتوو ئازاد ده‌كرێت".
ئه‌ربیل یه‌هود كێیه؟
ئه‌ربیل خانمێكی ئیسرائیلی ته‌مه‌ن 29 ساڵه و له ئۆردووگای نیشته‌جیبوونی نیر ئۆز له ده‌وروبه‌ری كه‌رتی غه‌ززه‌دا ده‌ژیا.
به‌گوێره‌ی میدیاكانی ئیسرائیل، ئه‌ربیل له‌گه‌ڵ خۆشه‌ویسته‌كه‌ی به‌ناوی ئاریێل كۆنیۆ كه ئه‌ویش له ئۆردووگا ده‌ژیا، له ناو ماڵه‌كه‌یدا رفێندراوه.
له میانی ئۆپه‌راسیۆنی 7ی ئۆكتۆبه‌ردا، دۆلێڤ یه‌هود، برا گه‌وره‌كه‌ی ئه‌ربیل، كوژرا، ئیسرائیل چاره‌نووسی نه‌ده‌زانی، تاوه‌كو ته‌رمه‌كه‌ی له نیر ئۆز دۆزرایه‌وه و له 3ی حوزه‌یرانی 2024دا ته‌رمه‌كه‌ی ناسرایه‌وه.
ئه‌ربیل وه‌ك راهێنه‌ری گه‌ڕان به گه‌ردوون و زانای فه‌له‌كناسی له ئه‌نجومه‌نی ناوچه‌ی ئه‌شكۆڵ له ده‌وروبه‌ری غه‌ززه كارده‌كات و میدیاكانی ئیسرائیلیش بڵاویانكرده‌وه كه ئه‌و لای حه‌ماس نییه، به‌ڵكو لای گرووپێكی تری فه‌له‌ستینییه‌كانه.
ناكۆكییه‌كه له‌وه‌دایه كه گروپه فه‌له‌ستینییه‌كان، ئه‌ربیل به كه‌سێكی سه‌ربازی ده‌زانن، له به‌رامبه‌ردا ئیسرائیل ده‌ڵێت كه‌سێكی مه‌ده‌نییه.
رۆژنامه‌ی یه‌دیعۆت ئه‌حرۆنۆت له راپۆرتێكدا رایگه‌یاند كه ناكۆكی له نێوان بزووتنه‌وه‌ی حه‌ماس و ئیسرائیل هه‌یه سه‌باره‌ت به لیستی ئه‌و ژنه ده‌ستبه‌سه‌ركراوانه‌ی كه ڕۆژی شه‌ممه ئازاد ده‌كرێن.
ئاماژه‌ی به‌وه‌شكردووه، له رێكخستنه‌كه‌دا مه‌رجی ئه‌وه هاتووه كه سه‌ره‌تا ژنانی مه‌ده‌نی ئازاد بكرێن.
PM:03:56:25/01/2025
ئه‌م بابه‌ته 35344
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت