ئیداره‌ی نوێی سوریا پله‌ی ده‌یان به‌رپرسی گرووپه چه‌كداره‌كانی به‌رزكرده‌وه
وێستگه‌نیوز-
ئه‌مڕۆ یه‌كشه‌ممه، ئیداره‌ی نوێی سوریا به سه‌رۆكایه‌تی ئه‌حمه‌د شه‌رع ناسراو به ئه‌بو محه‌مه‌د جۆلانی پله‌ی سه‌ربازی ده‌یان به‌رپرسی گرووپه چه‌كداره‌كانی به‌رزكرده‌وه له‌نێویاندا پله‌ی مورهه‌ف ئه‌بو قه‌سره، وه‌زیری به‌رگری و نوره‌دین ئه‌لنه‌عسان سه‌رۆكی ده‌سته‌ی ئه‌ركانی هاوبه‌شی به‌رزكره‌وه بۆ پله‌ی لیوا.
ئاژاسنی هه‌واڵه‌كانی سوریا "سانا" بڵاویكرده‌وه كه به‌پێی بڕیاره‌كه پله‌ی پێنج به‌رپرسی گرووپه چه‌كداره‌كان بۆ عه‌مید، و 42 كه‌سی تر بۆ پله‌ی عه‌قید به‌رزده‌كرێته‌وه.
ئه‌و بڕیاره، به‌گوێره‌ی راگه‌یه‌ندراوه‌كه، "له‌سه‌ر بنه‌مای به‌رژه‌وه‌ندی باڵای نیشتمانی، و له‌چوارچێوه‌ی ده‌ستپێكردنی پرۆسه‌ی په‌ره‌پێدان و مۆدێرنكردنی سوپا و هێزه چه‌كداره‌كان، و بنیاتنانی چوارچێوه‌ی نیشتمانی بۆ گه‌یشتن به ئاسایش و سه‌قامگیری و له‌سه‌ر بنه‌مای پێداویستییه‌كانی كاری سه‌ربازی” دراوه.
پێشتر ئیداره‌ی نوێی سوریا رایگه‌یاند كه له‌گه‌ڵ "سه‌رجه‌م گروپه چه‌كداره‌كان" گه‌یشتووه‌ته رێككه‌وتن به ئامانجی هه‌ڵوه‌شاندنه‌وه و یه‌كخستنیان له‌ژێر چه‌تری وه‌زاره‌تی به‌رگری.
هاوكات ده‌سه‌ڵاتداری نوێی سوریا مورهه‌ف ئه‌بو قه‌سره-ی راسپارد وه‌ك وه‌زیری به‌رگری له حكومه‌تی كاتی سوریا و نوره‌دین نه‌عسانی بۆ پۆستی سه‌رۆكی ده‌سته‌ی ئه‌ركانی سوریا راسپارد.
PM:11:52:29/12/2024
ئه‌م بابه‌ته 920
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت