هێرشی مووشه‌كی كرایه‌سه‌ر ته‌لئه‌بیب و بریندار هه‌یه
وێستگه‌نیوز-
هێرشی مووشه‌كی كرایه‌سه‌ر ته‌لئه‌بیبی پایته‌ختی ئیسرائیل و به‌هۆیه‌وه ژماره‌یه‌ك كه‌س برینداربوون، ئاگریش كه‌وته‌وه و كاره‌با بڕا.
ئێواره‌ی ئه‌مڕۆ دووشه‌ممه پۆلیسی ئیسرائیل رایگه‌یاند كه چه‌ند موشه‌كێك له ناوچه‌ی ته‌لئه‌بیب كه‌وتوونه‌ته خواره‌وه.
له ڕاگه‌یه‌ندراوێكی پۆلیسی ئیسرائیلدا هاتووه كه "له‌ئه‌نجامی بۆردوومانه‌كه‌دا چه‌ندین باڵه‌خانه و پاسێكی چۆڵ كه له نزیكه‌وه بووه زیانیان پێگه‌یشتووه، هه‌روه‌ها 4 كه‌سیش برینداربوون به رێژه‌ی جیاواز بۆ وه‌رگرتنی چاره‌سه‌ر ره‌وانه‌ی نه‌خۆشخانه كراون".
ئاماژه به‌وه‌شكراوه كه "هێزه‌كانی ناوچه‌ی ته‌لئه‌بیب ئۆپه‌راسیۆنی فراوان ئه‌نجام ده‌ده‌ن بۆ رزگاركردنی ئه‌و كه‌سانه‌ی گیریان خواردووه".
هاوكات میدیاكان و ده‌زگای ئه‌مبولانسی ئیسرائیل بڵاویانكرده‌وه، له ئه‌نجامی كه‌وتنه‌خواره‌وه‌ی پارچه مووشه‌كه‌كان له ته‌لئه‌بیب، چوار كه‌س برینداربوون.
له‌و گرته ڤیدیۆییانه‌ی له پلاتفۆرمه‌كانی سۆشیال میدیادا بڵاوبوونه‌ته‌وه، ده‌ركه‌وتووه كه ئاگر له ناوچه‌یه‌كی بازرگانی نێوان به‌نی براك و ڕامات غان كه‌وتۆته‌وه.
كه‌ناڵی 12ی ئیسرائیلی بڵاویكرده‌وه، كه پارچه‌كانی ئه‌و مووشه‌كانه‌ی رێگایان لێگیراوه، به‌ر هێڵێكی كاره‌با له ڕامه‌ت غان كه‌وتوون و به‌هۆیه‌وه ئاگركه‌وته‌وه و پچڕانی كاره‌بای لێكه‌وته‌وه.
هاوكات رۆژنامه‌ی یه‌دیعۆت ئه‌حرۆنۆتی ئیسرائیلی بڵاویكرده‌وه كه ده‌سه‌ڵاتداران هۆشدارییان داوه‌ته هاووڵاتیان كه له ناوچه‌كانی ته‌لئه‌بیب، تانیا، ڕامات غان، به‌نی براك، حۆلۆن و ژماره‌یه‌ك ناوچه‌ی دیكه له ماڵه‌كانیان بمێننه‌وه.
PM:11:24:18/11/2024
ئه‌م بابه‌ته 872
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت