گالانت: دوای كوشتنی نه‌سروڵا و جێگره‌كه‌ی، حزبوڵا بووه‌ته رێكخراوێكی بێ سه‌ر
وێستگه‌نیوز-
ئه‌مڕۆ سێشه‌ممه 8ی تشرینی یه‌كه‌می 2024، وه‌زیری به‌رگری ئیسرائیل، رایگه‌یاند به ئه‌گه‌رێكی زۆره‌وه جێگره‌كه‌ی حه‌سه‌ن نه‌سروڵا ئه‌مینداری گشتی حزبوڵای لوبنانی، له بۆردومانه‌كه‌ی سه‌ر گه‌ڕه‌كه‌كه‌ی باشوری به‌یروت كوژراوه و حزبوڵای به حزبێكی دۆڕاو و بێ سه‌ركرده وه‌سف كرد.
گالانت له میانه‌ی كۆبوونه‌وه‌ی له‌گه‌ڵ فه‌رمانده‌كانی باكور، باسی له‌وه كردووه، حزبوڵا دوای هێرشه به‌رده‌وامه‌كان كه بووه‌هۆی كوژرانی حه‌سه‌ن نه‌سروڵا ئه‌مینداری گشتی حزبه‌كه، له ئێستادا ئه‌و حزبه "تێكشكاوه".
هه‌روه‌ها ده‌ڵێت: "حزبوڵا رێكخراوێكی تێكشكاو و وێرانه و هیچ سه‌ركرده‌یه‌كی نییه و توانایه‌كی ئه‌وتۆی شه‌ڕكردنی نه‌ماوه، دوای كوژرانی حه‌سه‌ن نه‌سروڵا سه‌ركردایه‌تییه‌كی لێكترازاو و په‌رتوبڵاوی هه‌یه".
یواف گالانت ئاماژه بۆ ئه‌وه‌ش ده‌كات جێگره‌وه‌كه‌ی ئه‌مینداری گشتی حزبوڵای لوبنانی، پێده‌چێت ئه‌ویش كوژرابێت و ده‌ڵێت: "حزبوڵا رێكخراوێكی بێ سه‌ره، نه‌سروڵا كوژرا، هه‌روه‌ها پێده‌چێت جێگره‌كه‌شی كوژرابێت".
وه‌زیری به‌رگری ئیسرائیل، له درێژه‌ی لێدوانه‌كه‌یدا ده‌ڵێت: "ئه‌م مه‌سه‌له‌یه، كوژرانی نه‌سروڵا، كاریگه‌رییه‌كی دراماتیكی له‌سه‌ر هه‌مو ئه‌و شتانه هه‌یه كه رووده‌ده‌ن، هه‌نووكه كه‌س نییه بڕیار بدات، كه‌س نییه كار بكات، ئه‌و سیستمه ئاگرینه‌ی كه حزبوڵا به درێژایی ساڵان و به وه‌به‌رهێنانی به‌رفراوانی ئێران دروستی كردبوو، له‌مڕۆدا گه‌شتووه‌ته ئاستێك، هاوشێوه‌ی ئه‌وه‌ی حه‌ماسه و ره‌نگه كه‌متریش بێت.
گالانت ئه‌وه‌شی خسته‌ڕوو: "هه‌مو ئه‌وانه، هاوكات له‌گه‌ڵ ئۆپه‌راسیۆنه گه‌وره‌كاندا كه له به‌ره‌كانی جه‌نگ ئه‌نجامده‌درێن، سه‌رجه‌م تواناكانی حزبوڵا ناهێڵێت و له‌ناویان ده‌بات".
له‌لایه‌كی دیكه‌وه تا ئێستا سوپای ئیسرائیل، به فه‌رمی كوژرانی هاشم سه‌فێدینی رانه‌گه‌یاندووه، له‌و بۆردومانه‌ی كرایه سه‌ر گه‌ڕه‌كێكی باشوری بێروت. هه‌روه‌ها حزبوڵای لوبنانی، كوشتنی هاشم سه‌فێدینی نه پشتڕاستكردووه‌ته‌وه و نه ره‌تیكردووه‌ته‌وه؟
PM:08:10:08/10/2024
ئه‌م بابه‌ته 824
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت