سه‌رۆكی‌ ئێران پۆستێكی‌ نوێی‌ به‌ محه‌مه‌د جه‌واد زه‌ریف دا

وێستگه‌نیوز-
مه‌سعود پزیشكیان سه‌رۆك كۆماری ئێران، به‌ فه‌رمانێك محه‌مه‌د جه‌واد زه‌ریفی وه‌ك جێگری ستراتیژی خۆی دیاریكرد، هۆكاره‌كه‌شی بۆ ئاستی به‌رز و شاره‌زایی ناوبراو گه‌ڕانده‌وه‌.

ئاماژه‌شیان به‌وه‌دا كه‌ له‌ فه‌رمانه‌كه‌ی‌ پزیشكیان-دا هاتووه‌ كه‌ "به‌ پشتبه‌ستن به‌ ماده‌ی 124ی ده‌ستور و به‌پێی ئاستی لێهاتوویی و ئه‌زمونی به‌نرخی به‌ڕێوه‌بردنی تۆماری ئه‌كادیمی و جێبه‌جێكردن، محه‌مه‌د جه‌واد زه‌ریف وه‌ك جێگری ستراتیژی سه‌رۆك دیاری ده‌كه‌م".

محه‌مه‌د جه‌واد زه‌ریف خوانساری له‌دایكبووی ساڵی 1960ی تارانی پایته‌خته‌، له‌ 15ی ئابی 2013دا و له‌لایه‌ن حه‌سه‌ن روحانی سه‌رۆكی كۆماری پێشوتری ئێرانه‌وه‌ وه‌ك وه‌زیری كاروباری ده‌ره‌وه‌ هه‌ڵبژێردرا.

محه‌مه‌د جه‌واد زه‌ریف چه‌ندین پۆستی دیكه‌ی نێوده‌وڵه‌تی و ناوخۆیی هه‌بووه‌، له‌وانه‌ش ڕاوێژكاری باڵای وه‌زیری ده‌ره‌وه‌، جێگری وه‌زیری ده‌ره‌وه‌ بۆ كاروباری یاسایی و نێوده‌وڵه‌تی، ئه‌ندامی باڵای ده‌ستپێشخه‌ری دیالۆگی شارستانیه‌ته‌كان، سه‌رۆكی كۆمسیۆنی داماڵینی چه‌ك له‌ نه‌ته‌وه‌ یه‌كگرتووه‌كان له‌ نیویۆرك، جێگری سه‌رۆك بۆ كاروباری نێوده‌وڵه‌تی له‌ زانكۆی ئیسلامی ئازاد.

PM:08:56:01/08/2024

ئه‌م بابه‌ته 3840 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت