عێراق؛ ساڵانە ملیۆنێک و 250 هەزار کەس زیاد دەبێت و ژمارەی دانیشتووانی لە 50 ملیۆن نزیک دەبێتەوە

وێستگەنیوز-

وەزارەتی پلاندانانی عێراق باشبوونی کۆمەڵێک لە نیشاندەرەکانی گەشەپێدانی لە وڵاتدا راگەیاند، هاوکات لەگەڵ تۆمارکردنی دابەزین لە ڕێژەی وەچەخستنەوە و گەشەی دانیشتووان، ئاشکرای کرد، ژمارەی دانیشتووانی عێراق گەیشتووەتە زیاتر لە 46 ملیۆن کەس و لە 70%ـیخێزانەکانیش خاوەنی یەکەی نیشتەجێبوونی خۆیانن.

ماهر حماد جوهان، بریکاری وەزارەتی پلاندانان لە لێدوانێکدا رایگەیاند، ئەنجامەکانی سەرژمێری و راپرسییە ئابووری و کۆمەڵایەتییەکان ئاماژە بە باشبوونی ئاستی گەشەپێدانی مرۆیی و خزمەتگوزارییەکان دەکەن لە عێراق تاوەکو کۆتایی ساڵی 2025، لەوانەش بەرزبوونەوەی ناوەندی تەمەنی پێشبینیکراو و کەمبوونەوەی رێژەی مردن بەهۆی نەخۆشییەکانەوە.

لە بابەتەکانی نیشتەجێبوون و دانیشتوواندا، وەزارەتی پلاندانان ئاماژەی بەوە کرد، زیاتر لە 70%ـی خێزانەکان خاوەنی خانووی خۆیانن لە بەرامبەر 30%ـی کرێنشین، هاوکات ژمارەی دانیشتووانی ئێستای عێراق گەیشتووەتە 46 ملیۆن و 118 هەزار و 793 کەس کە هاوسەنگی لە نێوان ڕەگەزی نێر و مێدا هەیە.

وتیشی، ساڵانە لە نێوان یەک ملیۆن تا یوک ملیۆن و 250 هەزار منداڵ لە عێراق لەدایک دەبن، ئەمەش پێویستی بە دروستکردنی ساڵانەی نزیکەی 200 هەزار یەکەی نیشتەجێبوونی نوێ و دابینکردنی خزمەتگوزارییە بنەڕەتییەکان هەیە.

وەزارەتی پلاندانان ئەوەشی خستەڕوو، دابەزینی رێژەی وەچەخستنەوە پەیوەستە بە بەرزبوونەوەی ئاستی هۆشیاری و پەروەردەیی ژنان و گۆڕانی تێگەیشتنە کۆمەڵایەتییەکان لەسەر هاوسەرگیریی پێشوەختە، هاوکات پێشبینی دەکرێت ژمارەی دانیشتووانی عێراق تاوەکو ساڵی 2030 سنووری 30 ملیۆن کەس تێپەڕێنێت، کە ئەمەش ئاستەنگ لەبەرامبەر پلانەکانی دەوڵەت بۆ دابینکردنی ژێرخانوقوتابخانە و مەڵبەندە تەندروستییەکان دروست دەکات.

PM:10:00:29/09/2026

ئه‌م بابه‌ته 108 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت