وەزیری نەوتی عێراق: هەناردەی نەوت گەیشتووەتە 3 ملیۆن بەرمیلی ڕۆژانە

وێستگەنیوز-

وەزیری نەوتی عێراق ڕایگەیاند، لەم مانگەدا ئاستی هەناردەکردنی نەوتی وڵاتەکەیان گەیاندووەتە 3 ملیۆن بەرمیلی ڕۆژانە و لە پلانیشیاندایە هەناردەکردن لە ڕێگەی وڵاتانی دراوسێوە فراوانتر بکەن.

باسم محەممەد خوزەیر، وەزیری نەوتی عێراق لە لێدوانێکی ڕۆژنامەوانیدا ئاشکرای کرد: لە مانگی ئەیلوولدا هەناردەی نەوتی عێراق گەیشتووەتە 3 ملیۆن بەرمیلی ڕۆژانە، هەروەها لە پلانماندایە هەناردەکردنی نەوت لە ڕێگەی هەردوو وڵاتی سووریا و تورکیاوە بگەیەنینە 1 ملیۆن بەرمیلی ڕۆژانە.

سەبارەت بە پابەندبوونی عێراق بە ڕێککەوتنە نێودەوڵەتییەکان، وەزیری نەوت جەختی لەوە کردەوە کە وڵاتەکەی بە تەواوی پابەندی بڕیارەکانی ڕێکخراوی ئۆپیک دەبێت و بەرهەمهێنان لە 4.2 ملیۆن بەرمیلی ڕۆژانە تێناپەڕێنن.

لە بەشێکی دیکەی وتەکانیدا، ناوبراو ئاماری دارایی خستەڕوو و ئاماژەی بەوە کرد، کۆی داهاتی نەوتی عێراق لە مانگی ئابی ڕابردوودا گەیشتووەتە 4.5 ملیار دۆلار.

PM:04:50:10/09/2026

ئه‌م بابه‌ته 148 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت