لە سلێمانی و بە ئامادەبوونی قوباد تاڵەبانی بانکی جینی ڕووەکی کرایەوە

وێستگەنیوز-

ئەمڕۆ لە مەراسیمێکدا لە پارکی هەواری شار لە شاری سلێمانی، بە ئامادەبوونی قوباد تاڵەبانی، جێگری سەرۆک وەزیرانی هەرێمی کوردستان، بانکی جینی ڕووەکی کرایەوە کە هەنگاوێکی گرنگە بۆ پاراستنی جۆرە جیاوازەکانی ڕووەک لە ناوچەکەدا.

ئەمڕۆ یەکشەممە 23ـی ئابی 2026، لە سلێمانی یەکەمین بانکی بانکی جینی ڕووەکی لە هەرێمی کوردستان کرایەوە، پڕۆژەکە بە هەماهەنگی نێوان وەزارەتی کشتوکاڵ و سەرچاوەکانی ئاو، ڕێکخراوی فاو و یەکێتی ئەوروپا جێبەجێ کراوە، ئامانج لێی پاراستنی بەرهەمە سروشتی و ژینگەییەکانە لە هەرێمی کوردستان.

لە میانی مەراسیمەکەدا، دکتۆر هەڤاڵ ئەبووبەکر، پارێزگاری سلێمانی ڕایگەیاند: تەنها لە سنووری پارێزگای سلێمانی نزیکەی 600 جۆر ڕووەک هەیە، ئەمەش دەوڵەمەندی ناوچەکە نیشان دەدات لە ڕووی ژینگەییەوە.

لەلایەکی دیکەوە، نوێنەری یەکێتی ئەوروپا لە عێراق جەختی کردەوە لەوەی کردنەوەی ئەم بانکە بۆ پەرەپێدانی سیستمی ڕووەکییە لە عێراق و هەرێمی کوردستان، وتیشی: دەمانەوێت ئەم دامەزراوەیە هەمووان کۆبکاتەوە و کار لەگەڵ حکومەتی هەرێم دەکەین بۆ گەشەپێدانی کەرتی کشتوکاڵ.

هاوکات نوێنەری ڕێکخراوی فاو ئاماژەی بەوە کرد، شانازی دەکەین لەگەڵ حکومەتی عێراق و هەرێم کاردەکەین، کۆمەڵێک پلانمان هەیە بۆ ئەوەی ڕووەک لە هەرێمی کوردستان بە باشترین شێوە بەرهەم بێت.

لای خۆشییەوە، بریکاری وەزیری کشتوکاڵی عێراق خۆشحاڵی خۆی بۆ ئەنجامدانی پڕۆژەکە لە سلێمانی دەربڕی و ڕایگەیاند: ئەم پڕۆژەیە نەک تەنها بۆ ئێستا، بەڵکو بۆ نەوەکانی داهاتووش گرنگییەکی زۆری دەبێت.

لە کۆتایی مەراسیمەکەدا، بێگەرد تاڵەبانی، وەزیری کشتوکاڵ و سەرچاوەکانی ئاوی هەرێم ڕایگەیاند: ئەم پڕۆژەیە دوای چەندین گرفت و ئاستەنگی گەورە لەدایک بوو، بانکەکە جگە لە لایەنە زانستی و ژینگەییەکەی، دەبێتە هۆی ڕەخساندنی هەلی کار بۆ گەنجان و پسپۆڕانی ناوچەکە.

AM:08:30:23/08/2026

ئه‌م بابه‌ته 1044 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت