عەلی زەیدی: بەرەنگاربوونەوەی گەندەڵی لە پێشینەی کارەکانمانە
وێستگەنیوز-
سەرۆک وەزیرانی عێراق،
لە یەکەم وتاری فەرمیدا دوای وەرگرتنی متمانەی پەرلەمان، کارنامە و لەپێشینەکانی
حکومەتەکەی ڕاگەیاند و جەختی لە ئەنجامدانی چاکسازیی ئابووری و ڕووبەڕووبوونەوەی گەندەڵی
کردەوە.
عەلی فالح زەیدی، سەرۆک
وەزیرانی عێراق ڕایگەیاند، لەپێشینەی کارەکانیان جێبەجێکردنی بەرنامەیەکی چاکسازیی
ئابووری و دارایی گشتگیرە بە ئامانجی بونیادنانی ئابوورییەکی نیشتمانیی بەهێز کە تەنها
پشت بە یەک سەرچاوەی داهات نەبەستێت، بەڵکو کەرتەکانی پیشەسازی، کشتوکاڵ، گەشتوگوزار
و وەبەرهێنان ببوژێنێتەوە و ڕۆڵی کەرتی تایبەت کارا بکات. هەروەها، جەختی لە
پاراستنی ماڵی گشتی و بەرەنگاربوونەوەی توندی هەموو جۆرەکانی گەندەڵی کارگێڕی و
دارایی کردەوە، کە بەوتەی ئەو بووەتە ئاستەنگی گەورە لەبەردەم گەشەپێدان و پەکخستنی
دامەزراوەکانی دەوڵەتدا.
لە بەشێکی دیکەی وتارەکەیدا،
زەیدی پابەندبوونی حکومەتەکەی بۆ باشترکردنی خزمەتگوزارییە گشتییەکان، بەتایبەت تەندروستی،
پەروەردە و ژێرخانی کارەبا، ئاو، ڕێگاوبان و نیشتەجێبوون دووپات کردەوە. ئاماژەی بەوەش
کرد، گەنجان گەورەترین سامانی وڵاتن و کەمکردنەوەی بێکاری و ڕەخساندنی هەلی کار لە
ئەولەویەتەکانیان دەبێت. لە کۆتاییشدا، جەختی لە پاراستنی سەروەریی عێراق و بەهێزکردنی
پەیوەندییەکان لەگەڵ وڵاتانی ناوچەکە و جیهان کردەوە، و سوپاسی مەرجەعیەتی باڵا و
سەرجەم هێزە سیاسییەکانی کرد بۆ پشتیوانییان لە پێکهێنانی حکومەت.
PM:02:53:16/05/2026
ئهم بابهته 212
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت