روانگەی ئیکۆ عێراق خەرجییەکانی وەزارەتی نەوت بۆ ساڵی 2025 ئاشکرادەکات

وێستگەنیوز-

روانگەی ئیکۆ عێراق ئاشکرای دەکات کە خەرجی وەبەرهێنانی تەنیا یەک ساڵی وەزارەتی نەوتی عێراق، یەکسانە بە نرخی کڕینی 80 کەشتی نەوتهەڵگر.

لە راگەیەندراوێکدا روانگەی ئیکۆ عێراق رایگەیاند، "وەزارەتی نەوت یەکێکە لەو وەزارەتانەی کە لە بە درێژایی ساڵانی رابردوو زۆرترین بودجەی وەبەرهێنانی بۆ تەرخان کراوە، بەگوێرەی ئامارەکان، خەرجی وەبەرهێنانی ئەم وەزارەتە بۆ ساڵی 2025، گەیشتووەتە زیاتر لە 12 ترلیۆن و 873 ملیار دینار کە دەکاتە نزیکەی 9.9 ملیار دۆلار".

لە راپۆرتەکەدا هاتووە، عێراق دەیتوانی بەم بڕە پارەیە نزیکەی 80 کەشتی نەوتهەڵگری جۆری (VLCC)ی زەبەلاح بکڕێت، کە نرخی هەر دانەیەکیان نزیکەی 110 ملیۆن دۆلارە، عێراق دەیتوانی ئەم کەشتیگەلە بۆ گواستنەوەی نەوتی خۆی و وڵاتانی دیکەش بەکاربهێنێت و داهاتێکی زۆری لێ دەستبکەوێت.

لە بەیاننامەکەدا روونکراوەتەوە کە تانکەرەکان چەندین جۆری جیاوازیان هەیە، وەک (ULCC)ی زۆر گەورە، (VLCC)ی زەبەلاح، (Suezmax)ی مامناوەند و چەند جۆرێکی دیکەی وەک (Aframax) و (Panamax).

روانگەی ئیکۆ ئاماژە بەوە دەدات کە ئەم قەبارە گەورەیەی خەرجییەکان، پرسیار لەسەر ئەولەویەتەکانی خەرجکردنی پارە دروست دەکات، بەتایبەت لە سایەی زیادبوونی قەیرانە ئابوورییەکان و پێویستی کەرتە بنەڕەتییەکانی وەک کارەبا، ئاو و تەندروستی.

باس لەوەش کراوە، وەبەرهێنان لە کەشتیگەلێکی نیشتمانی بۆ گواستنەوەی نەوت، دەتوانێت ئاسایشی هەناردەکردنی نەوتی عێراق بپارێزێت و داهاتەکان زیاد بکات، بێ ئەوەی وڵات پشت بە کۆمپانیا بیانییەکان ببەستێت.

PM:12:39:06/04/2026

ئه‌م بابه‌ته 200 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت