چوارچێوەی هەماهەنگی: بە ئامانجگرتنی ماڵی سەرۆکی هەرێمی کوردستان و چەند شوێنێکی دیکە ئاماژەی مەترسیدارن

وێستگەنیوز-

لایەنەکانی ناو چوارچێوەی هەماهەنگی لە نووسینگەی موحسین مەندەلاوی کۆبوونەوەی ئاسایی خۆیان ئەنجامدا، بۆ تاوتوێکردنی دوایین پێشهاتە سیاسی و ئەمنییەکانی عێراق و ناوچەکە و هێرشەکانی سەر کۆماری ئیسلامی ئێران.

ئەمڕۆ دووشەممە 30ی ئاداری 2026، چوارچێوەی هەماهەنگی لە بەیاننامەیەکدا جارێکی دیکە رەتکردنەوەی توندی خۆی بۆ هەر پێشێلکارییەکی سەروەریی عێراق دووپاتکردەوە، بە تایبەتی بەکارهێنانی ئاسمانی عێراق بۆ ئەنجامدانی کاری دوژمنکارانە دژی وڵاتانی دراوسێ رایگەیاند، "دەبێت عێراق لە ململانێ هەرێمییەکان بەدوور بگیرێت و بڕیاری نیشتمانیی سەربەخۆی بپارێزرێت".

هەروەها سەرکۆنەی ئەو هێرشانەی کرد کە کرانە سەر هێزە ئەمنییەکان و بوونە هۆی کوژرانی زیاتر لە 100 کەس، هاوکات داوای پاراستنی دامەزراوە ئەمنییەکان و نێردە دیپلۆماسییەکانی کرد.

چوارچێوەی هەماهەنگی رایگەیاند، "بە ئامانجگرتنی ماڵی سەرۆکی هەرێمی کوردستان و چەند شوێنێکی دیکە، ئاماژەی مەترسیدارن و هەوڵێکی لایەنە دەرەکییەکانە بۆ تێکدانی سەقامگیری و تێکەڵکردنی کارتەکان، ئەمەش پێویستی بە وریایی و هەماهەنگی نیشتمانی زیاتر هەیە".

هەروەها چوارچێوەی هەماهەنگی دەستخۆشی لە جووڵەکانی ئەنجوومەنی نوێنەران کرد بۆ یەکلاکردنەوەی پۆستی سەرۆککۆمار.

چوارچێوەی هەماهەنگی داوای لە هەموو هێزە سیاسییەکان کرد پەلە بکەن لەم ئیستحقاقە دەستوورییە و سوود لە وادەی دیاریکراو بۆ کۆبوونەوەی پەرلەمان وەربگرن، تاوەکو کۆتایی بەو چەقبەستووییە سیاسییە بهێنرێت کە زیانی بە وڵات گەیاندووە.

AM:09:07:30/03/2026

ئه‌م بابه‌ته 252 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت