باڵیۆزخانەی ئەمریکا لە بەغدا: هەواڵی کشانەوەی هێزەکانمان لە عێراق ناڕاستن

وێستگەنیوز-

دوای ئەوەی هەواڵی کشانەوەی هێزەکانی ئەمریکا لە میدیا عێراقییەکان بڵاوکرایەوە، باڵیۆزخانەی ئەمریکا لە بەغدا ئەو هەواڵەی رەتکردەوە.

ئەمڕۆ هەینی 29ی ئابی 2025، کەناڵی ئەلعەرەبییە لە هەواڵێکدا رایگەیاند، "سبەینێ شەممە هێزەکانی ئەمریکا لە ناوچەی سەوز و فڕۆکەخانەی بەغدا و بارەگای فەرماندەیی ئۆپەراسیۆنە هاوبەشەکان دەست بە کشانەوە دەکەن، ئەم کشانەوەیەش لە چوارچێوەی رێککەوتنی نێوان عێراق و ئەمریکایە".

هەر ئێوارەی ئەمڕۆ وتەبێژی باڵیۆزخانەی ئەمریکا لە بە‌غدا رایگەیاند، "ئەو هەواڵانەی ئاماژە بەوە دەکەن کە هێزەکانی ئەمریکا لە سبەینێوە بەغدا بە تەواوی چۆڵ دەکەن نادروستن".

روونیشیکردەوە، "هێزەکانی ئەمریکا بەپێی ئەو خشتەیە دەکشێنەوە کە لەو بەیاننامە هاوبەشەی لە 27ی ئەیلولی 2024 دەرچووە، کە تایبەتمەندە بە خشتەی کاتی کۆتاییهێنان بە ئەرکە سەربازییەکانی هاوپەیمانی نێودەوڵەتی دژی داعش لە عێراق".

PM:08:05:29/08/2025

ئه‌م بابه‌ته 152 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت