لە عێراق داوای قەدەغەکردنی تیکتۆک دەکرێت
وێستگەنیوز-
وەزیری گەیاندنی عێراق رایدەگەیەنێت، داواكارییان پێشكەش كردووە بۆ قەدەغەكردنی ئەپڵیكەیشنی تیكتۆك و چاوەڕێی بڕیاری پەرلەمان دەكەن.
ئەمڕۆ شەممە 5ی نیسانی 2025، هەیام یاسری، وەزیری گەیاندنی عێراق بە ئاژانسی هەواڵی عێراقی راگەیاند، "لەپێشینەی پڕۆژەكانی وەزارەت بۆ ساڵی 2025 تەواوكردنی مۆڵەتی نیشتمانییە بۆ مۆبایلەكان بە تەكنەلۆژیای نەوەی پێنجەم، هەروەها بڵاوكردنەوەی كێبڵی فایبەر ئۆپتیک و گەیاندنی بە زۆرترین ژمارەی بەكارهێنەران بۆ باشتركردنی خزمەتگوزاری ئینتەرنێت و كۆتایهێنان بە خزمەتگوزاری وای فای".
ئاماژەی بەوەشكرد، "كاردەكەن بۆ چالاككردنی ترانزێت و كێبڵی فایبەر ئۆپتیک و ئەو پڕۆژانەی وایكرد وڵاتانی نێودەوڵەتی و كۆمپانیا گەورە نێودەوڵەتییەكان چاویان لەسەر كۆریدۆری عێراق بێت".
وەزیری گەیاندنی عێراق وتی، "پێشتر داواكارییەكی فەرمیمان پێشكەشكردووە بە مەبەستی قەدەغەكردنی ئەپڵیكەیشنی تیكتۆك لە عێراق، ئەوەش دوای پێشكەشكردنی هەزاران تانە بووە لەلایەن زۆربەی خێزانە عێراقییەكان سەبارەت بە راگرتن و قەدەغەكردنی ئەو ئەپە، چونكە زۆر شتی تێدایە كە بۆ گەلەكەمان و خێزانەكانمان ناگونجێت".
ئەوەشی خستەڕوو، "تەنها ئەوان نین كە بڕیارەكان دەدەن، وەك چۆن داواكارییەكمان پێشكەشكرد، هیوادارین پەرلەمانی عێراقیش بڕیارێك بۆ ئەو كارە دەربكات و جێبەجێی بكەین".
PM:11:42:05/04/2025
ئه‌م بابه‌ته 372
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت