فراکسیۆنە کوردستانییەکان بایکۆتی دانیشتنەکانی پەرلەمانی عێراق دەکەن

وێستگەنیوز-

بەهۆی تێنەپەڕاندنی پرۆژە یاسای بە پارێزگابوونی هەڵەبجە فراکسیۆنە کوردستانییەکان بڕیاریانداوە بەشداری دانیشتنەکانی ئەنجومەنی نوێنەرانی عێراق نەکەن.

چرۆ حەمە شەریف، ئەندامی ئەنجومەنی نوێنەرانی عیراق لەفراكسیۆنی یەكێتی بە میدیای فەرمی یەکێتی راگەیاند، "ئەگەر دانیشتنەکانی ئەنجومەنی نوێنەران دەستپێبکاتەوە، ئەوە ئێمە وەک فراکسیۆنە کوردستانییەکان بڕیاری ئەوەمانداوە بەشداری لە هیچ دانیشتنێکی پەرلەماندا نەکەین".

ئەوەشی خستەڕوو، "ئێمە کە 65 پەرلەمانتارین ئامادەی هیچ دانیشتنێک نابین و رێگاش نادەین هیچ پرۆژە یاسایەک تێپەڕێندرێت تا پرۆژە یاسای بە پارێزگابوونی هەڵەبجە نەخرێتە بەرنامەی کارەوە".

ئاماژەی بەوەشکرد، "دوای ئەوەی پڕۆژە یاساکە لەسەر داوای ئێمە خرایە بەرنامەی کارەوە، بەڵام دەنگی پێنەدرا، ئێمە وەک فراکسیۆنە کوردستانییەکان بڕیاری بایکۆتی دانیشتنەکانمان دا و ئامادەی دانیشتنەکان نابین، هەروەها پێویستە پرۆژە یاسای بەپارێزگابوونی هەڵەبجە بە تەنها بخرێتە بەرنامەی کارەوە و لە پاڵ هیچ پرۆژە یاسایەک نەبێت".

ئەو ئەندام پەرلەمانی وتی، "ئێمە دەچینەوە پەرلەمان و بەشداری لیژنەکان دەکەین، بەڵام بەشداری دانیشتنەکان ناکەین".

PM:08:00:04/04/2025

ئه‌م بابه‌ته 636 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت