وەزارەتی پلاندانانی عێراق: زیاتر لە 130 هەزار بژمێر بەشداری پرۆسەی سەرژمێری دەکەن
وێستگەنیوز_
وەزارەتی پلاندانانی عێراق ڕایگەیاند: لە پرۆسەی سەرژمێری دانیشتوواندا زیاتر لە 130 هەزار بژمێر بەشدار دەبن.
ئەمڕۆ سێشەممە 19ـی تشرینی دووەمی 2024، عەبدولفەتاح ڕەئووف، بەڕێوەبەری گشتی فەرمانگەی کاروباری تەکنیکی لە دەستەی ئامار و سەرۆکی بەشی تەکنیکی و مەیدانی بۆ سەرژمێری لە وەزارەتی پلاندانانی عێراق، بە ئاژانسی هەواڵی عێراقی راگەیاند: سبەی بژمێرەکان لە کاتژمێر 07:00ـی بەیانییەوە، بە مەبەستی پشتڕاستکردنەوەی ئەو زانیارییانەی کە پێشوەختە بە شێوەی ئەلیکترۆنی تۆماریان کردووە سەردانی ماڵەکان دەکەن.
ئاماژەی بەوەشکردووە، بژمێرەکان سێ جار سەردانی ماڵەکان دەکەن بۆ پشتڕاستکردنەوەی زانیاری و داتاکان.
دەشڵێت: بژمێرەکان دەستەواژەی "خانووەکە داخراوە" لەسەر ئەو خانووانە دەنووسن، کە دانیشتووانەکەی دەرگا ناکانەوە یاخوود لەوێ نین، دوای ئەوەی سێ جار بۆ دڵنیابوونەوە سەردانیان دەکەن.
ئەو بەڕێوەبەرە گشتییە دەڵێت: ژمارەی بژمێرەکان 130 هەزار کەسی تێپەڕاندووە ئەمە جگە لە سەرپەرشتیاران.
بڕیارە لە 20 و 21ـی ئەم مانگە لە سەرتاسەری عێراق و هەرێمی کوردستان پرۆسەی سەرژمێری گشتیی دانیشتووان بەڕێوە بچێت.
PM:10:36:19/11/2024
ئه‌م بابه‌ته 156
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت