حکومەتى عێراق لەبارەى نیازى ئیسرائیل بۆ کوشتن و بە ئامانجگرتنى عەلى سیستانى هاتە دەنگ
وێستگەنیوز_
دوای ئەوەی ئیسرائیل، وێنەی ژمارەیەک کەسایەتیی شیعەی ناوچەکەی بڵاوکردەوە یەکێک لە وێنەکان، عەلی سیستانی، مەرجەعی باڵای شیعەکانی عێراق بوو لەناویاندا؛ و هێمایەکی سوور بەسەر وێنەکەیدا هاتبوو، راستەوخۆ حکومەتى عێراق، هاتە دەنگ و دڵنیایی دەدات لەوەی، بە توندوترین شێوە دەستدرێژیکردن و بێڕێزی بۆسەر پێگەى مەرجەعى باڵاى ئاینى رەتدەکەنەوە.
ئەمرۆ چوارشەممە 9ـی 10ـی 2024، باسم عەوادى، وتەبێژى حکومەتى عێراق، راگەیەندراوێکى بڵاوکردووەتەوە و تێیدا هاتووە، "حکومەتى عێراق بە توندوترین گوزارشت دژایەتى هەر دەستدرێژییەک بۆ پێگەى مەرجەعەکەیان دەکات و هۆشداریی دەدات لە مەترسیى ئەو هەوڵانەى پشتبەستوون بە پاشخانى بیرى رەگەزپەرستى و بێرێزیکردن بە پیرۆزیى گەلان، کە هاندەرى دەبێت بۆ فراوانکردنى بازنەى دوژمنکاری و ئاسایش و ئارامیى نێودەوڵەتى رووبەڕووى هەڕەشەیەکى راستەقینە دەکاتەوە."
هاوکات، داوا لە سکرتێری گستیى نەتەوەیەکگرتوەکان و کۆمەڵگەى نێودەوڵەتیی دەکات هەر "دەستدرێژییەک بۆ سەر هەستى موسڵمانانى جیهان لە رێگەى کەسایەتییە کاریگەرەکان سەرکۆنە بکەن و رەتیبکەنەوە."
ئاشکراشیکردووە کە حکومەت و گەلى عێراق هەموو هەوڵێکیان خستووەتەگەڕ بۆ راگرتنى شەڕ، بەڵام "قەوارەى جولەکە و حکومەتە توندڕەوەکەى و شکستى کۆمەڵگەى نێودەوڵەتى، رەوشەکەیان ئاڵۆزکردووە و ئەمڕۆ هەوڵى بڵاوکردنەوەى بێرێزى دەدات بۆ شاردنەوەى تاوانەکانى".
PM:03:53:09/10/2024
ئه‌م بابه‌ته 5580
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت