لیژنە هاوبەشەکانی قایمقامییەتی سلێمانی بۆ هاوڵاتییان: رێگە مەدەن قوربانییەکانتان بەشێوەی ناتەندروست ئەنجام بدرێت

‌

وێستگەنیوز- عومەر ئەحمەد

لیژنە هاوبەشەکانی قایمقامییەتی سلێمانی لەبارەی قوربانیکردنەوە هۆشداریی دەداتە هاوڵاتییان.

بابان ئەحمەد، سەرۆکی لیژنە هاوبەشەکانی قایمقامییەتی سلێمانی رایگەیاند، "لە یەکەم رۆژی جەژندا لیژنەکانمان لە ئەرکدان و چاودێری چۆنێتی قوربانیکردن دەکەن، داوا لە هاوڵاتییان دەکەن ئەوان کارێکی خێر دەکەن، رێگە نەدەن لە شوێنی خراپ و ناتەندروستدا ئاژەڵەکانیان بۆ سەرببڕدرێت".

ئاماژەی بەوەکرد، "لەگەڵ هێزە ئەمنییەکان بەردەوام لە ئەرکداین و هەر ئاژەڵفرۆشێک یان قەسابێک لە دەرەوەی قەسابخانەی رێگەپێدراو ئاژەڵ سەرببڕێت رێکاری یاسایی لەگەڵ دەگرینە بەر و رێگە نادەین گۆشت و ئاژەڵی ناتەندروست بچێتە ماڵەکانەوە، چونکە مەترسی بۆ سەر ژیان و تەندروستی هاولاتیان دروست دەکات".

بابان ئەحمەد ئەوەشی وت، "لە چەند شوێنێک سەرپێچی هەبووە و دەستمان بەسەر کەلوپەلەکاندا کردووە و بڵاوەمان پێکردوون".

ئەوەشی خستەڕوو، "ئێمە چاودێری شوێنە گەشتیارییەکان دەکەین و هەر سەرپێچییەک هەبێت لێپێچینەوە دەکەین".