لە هەولێر کرداری هاوشێوەکردنی سێیەم بۆ ئامێرەکانی هەڵبژاردن ئەنجام درا

وێستگەنیوز- شاهین فوئاد

ئەمڕۆ یەکشەممە 31ی ئابی 2025، لە چوارچێوەی ئامادەکارییەکان بۆ هەڵبژاردنی پەرلەمانی عێراق کە بڕیارە لە 11ی تشرینی دووەمی ئەمساڵ ئەنجام بدرێت دەنگدانی ئەزموونی لە هەولێر بەڕێوەچوو.

ئومێد خۆشناو، پارێزگاری هەولێر لە کۆنگرەیەکی رۆژنامەوانیدا رایگەیاند، "ئەمڕۆ لە هەولێر لە چەند قوتابخانەیەک بۆ سێیەم جار پرۆسەی دەنگدانی ئەزموونی بۆ هەڵبژاردنی پەرلەمانی عێراق ئەنجام درا".

ئاماژەی بەوەکرد، "پشتیوانی لە پرۆسەی هەڵبژاردن دەکەین و هەموو ئەو ئامادەکارییانە دەکەین کە پێویستن بۆ سەرخستنی پرۆسەکە لە سنووری پارێزگای هەولێر".

ئومێد خۆشناو وتی، "ئامێرەکانی دەنگدان بە باشترین کوالێتیان هەیە، ئەمەش وادەکات پرۆسەی دەنگدان خێراتر بەڕێوەبچێت".

وتیشی، "بەهۆی ئەم ئامێرانەوە ئەو گرفتانەی لە رابردوو هەبوون بۆ دەنگدان کۆتاییان دێت و هەموو هاوڵاتییان دەتوانن بەشداری دەنگدان بکەن، چونکە ئەگەر هاوڵاتییەک پەنجەمۆرەکەی نەیخوێنەوە ئەوا دەموچاوی وەردەگیرێت و دەناسرێتەوە و دەتوانێت دەنگ بدات".

AM:11:29:31/08/2025

ئه‌م بابه‌ته 200 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت