میران محەممەد: یەکێتی لەگەڵ هەر کارێکدایە کە بزانێت دەنگ و کورسی کورد کەم ناکات
وێستگەنیوز_
د. میران محەممەد، ئەندامی مەکتەبی سیاسی یەکێتی نیشتیمانی سلێمانی لە میانی سەردانیکردنی بارەگای نوێی سەندیکای کارمەندانی تەندروستی لقی سلێمانی رایگەیاند: "ئامانجی یەکێتی ئەوە بووە لە ناوچە کوردستانییە کێشەلەسەرەکان زۆرترین کورسی بهێنین، بۆ ئەوەی خەڵک لەو نەهامەتییە رزگار بکەین."
د. میران محەممەد سەبارەت بە رۆڵی کارمەندانی تەندروستی وتی: ئەمرۆ وەکو رێزێک بۆ کارمەندانی تەندروستی و پەرستاران؛ هاتینە خزمەتیان چونکە هەمیشە رۆلێکی کاریگەریان هەبووە. ئەم کارمەندانە لە کاتی ڤایرۆسی کۆرۆنا، لە شەڕەکانی داعش و تەنانەت لە کاتی قەیرانی داراییدا، نەیانهێشت سێکتەری تەندروستی بوەستێت.
هەروەها باسی لەوەکرد: پارێزگاری کەرکووک ئێستا بەدەست یەکێتییەوەیە، دوێنێ بینیم هەمووی خەریکی خزمەتگوزاری و رێگەوبانن، یەکێتی ئەوە ئامانجییەتی.
ئاماژەی بەوەشکرد، ئەوان وەک یەکێتی، پێیان وایە داهاتوو هەستیارە، هەموو لایەنەکان بێجگە لە کورد خۆیان ئامادەکردووە بۆ هەڵبژاردن، بۆیە یەکێتی و حیزبەکانی دیکەش حیزبی هەڵبژاردنن، "ئێمە هەر شتێک بۆ کورد باشبێت و پێمان وابێت 100 دەنگی کورد بە فیڕۆ ناڕوات، ئێمە لەگەڵ ئەوەین."
جەختیشی کردەوە لەوەی، "هەوڵدەدەین کورسی کەم نەکەین، چونکە لە دوای پرۆسەی سەرژمێری، ئەمە هەڵبژاردنێکی هەستیارە و هاوکێشەی هەڵبژاردن دەگۆڕێت؛ هەر بۆیە، هەر شتێک کورسی کورد کەم نەکات، ئێمە ئەو کارە دەکەین."
سەبارەت بە پێکهێنانی حکومەت، د. میران محەممەد وتی: "کۆبوونەوەکان بەردەوامن، دەبێت ئیشەڵڵا حکومەتی داهاتوو، حکومەتێک بێت لە خزمەت و بەرژەوەندی خەڵک بێت، زوو ناچین حکومەت دروستبکەین، ئارام دەگرین تا ئەو ئامانجە بەدی دەهێنین."
تەواوی کۆنگرە رۆژنامەوانییەکە:
AM:11:33:12/05/2025
ئه‌م بابه‌ته 128
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت