یه‌كه‌م لایه‌نی سیاسی پشتیوانی خۆی بۆ بایكۆتی مامۆستایان و فه‌رمانبه‌ران راگه‌یاند
وێستگه‌نیوز-
ره‌وتی هه‌ڵوێستی نیشتمانی وه‌ك یه‌كه‌م لایه‌نی سیاسی كوردستان پشتیوانی خۆی بۆ بایكۆتی مامۆستایان و فه‌رمانبه‌ران راگه‌یاند كه چه‌ند رۆژێكه له سنووری سلێمانی ده‌ستی پێكردووه.
ئه‌مڕۆ چوارشه‌ممه سه‌ردار قادر وته‌بێژی ره‌وتی هه‌ڵوێستی نیشتمانی له شاری سلێمانی راگه‌یه‌ندراوێكی ئاراسته‌ی رای گشتی كوردستان كرد و تیایدا ئاماژه‌ی به‌وه‌دا كه ره‌وته‌كه‌یان پشتگیری ته‌واوی بایكۆتی فه‌رمانبه‌ران و مووچه‌خۆرانی هه‌رێمی كوردستان ده‌كات و داواش له ئه‌ندامان و لایه‌نگرانیان ده‌كه‌ن به‌شداری چالاكانه‌ی بایكۆت بكه‌ن له سه‌رتاسه‌ری هه‌رێمی كوردستاندا.
سه‌ردار قادر ده‌ڵێت: "له‌م سۆنگه‌یه‌وه داوا له حكومه‌تی عێراق ده‌كه‌ین به زوویی بڕیاری دادگای فیدڕاڵی بۆ ته‌وتینی مووچه جێبه‌جێ بكه‌ن و چی تر مووچه‌خۆران نه‌كرێنه قوربانی و چاره‌نووسیان نه‌درێته ده‌ست ده‌سه‌ڵاتی شكستخواردووی هه‌رێمی كوردستان".
وتیشی: "سه‌رجه‌م په‌یوه‌ندییه سیاسییه‌كانی خۆمان خستووه‌ته‌گه‌ڕ بۆ ئه‌وه‌ی مووچه راسته‌وخۆ له به‌غداده‌وه بگاته مووچه‌خۆرانی هه‌رێمی كوردستان".
راشیگه‌یاند كه ره‌وته‌كه‌یان به‌شداری هه‌ر گردبوونه‌وه و خۆپیشاندانێك ده‌كات كه له‌لایه‌ن مامۆستایان و مووچه‌خۆران و فه‌رمانبه‌رانه‌وه رێكبخرێت".
ئه‌مه‌ش له‌كاتێكدایه كه له‌گه‌ڵ ئه‌وه‌ی سبه‌ینێ 5ی كانوونی یه‌كه‌مه، به‌ڵام تا ئێستا فه‌رمانبه‌ران و خانه‌نشینانی هه‌رێمی كوردستان مووچه‌ی هه‌ردوو مانگی رابردوو "تشرینی یه‌كه‌م" و "تشرینی دووه‌م"ی ئه‌مساڵیان وه‌رنه‌گرتووه و هیچ واده‌یه‌كیش بۆ دابه‌شكردنیان دیار نییه.
به‌وهۆیه‌شه‌وه به‌شێك له مامۆستایانی هه‌رێمی كوردستان بڕیاریانداوه نه‌چنه ناو هۆڵه‌كانی خوێندنه‌وه و بایكۆت بكه‌ن.
ساڵی پاریش حكومه‌تی هه‌رێم مووچه‌ی مانگه‌كانی تشرینی یه‌كه‌م 10، تشرینی دووه‌م 11، كانوونی یه‌كه‌م 12ی 2023ی موچه‌خۆرانی هه‌رێمی دابه‌ش نه‌كرد.
PM:05:11:04/12/2024
ئه‌م بابه‌ته 5316
جار خوێنراوه‌ته‌وه
لێرەوە کۆمێنت بنوسە لە فەیسبوک دەردەکەوێت