کەشناسی وادەی کۆتاییهاتنی باران و بارینی بەفر ئاشکرا کرد

وێستگەنیوز –فیردەوس دڵشاد

کەشناسی پێشبینی دەکات شەپۆلی بارانبارین لە درەنگانی ئەمشەودا بە تەواوی کۆتایی پێبێت و لە حاجی ئۆمەرانیش بەفر ببارێت؛ هاوکات لەگەڵ هاتنی بارستەهەوایەکی وشک و سارد، ئاسمان ساماڵ دەبێتەوە و پلەکانی گەرما لە شەواندا بۆ 0 پلە دادەبەزن.

ئەمڕۆ یەکشەممە 8ـی تشرینی دووەمی 2026، بەپێی پێشبینییە کەشناسییەکان کاریگەریی شەپۆلی بارانبارین بە شێوەیەکی لاواز و پچڕپچڕ تا درەنگانی شەو بەتایبەت لە ناوچەکانی ڕۆژهەڵاتی هەرێم بەردەوام دەبێت.

لە ئێوارەی ئەمڕۆشەوە بارستەهەوایەکی وشک و سارد لە باکوورەوە دەگاتە ناوچەکە و ئەگەری بارینی بەفرێکی کەم لە سەنتەری حاجی ئۆمەران و ناوچە شاخاوییەکانی بەرزیی سەرووی 1600 مەتر هەیە، پاشان شەپۆلەکە بە تەواوەتی کۆتایی دێت.

بۆ سبەی دووشەممە 9ـی تشرینی دووەم، کەشوهەوای هەرێم جێگیر دەبێت و ئاسمان ساماڵ دەبێت، بەڵام بەهۆی کاریگەریی ئەو بارستەهەوا ساردەوە، پلەکانی گەرما بەراورد بە ئەمڕۆ 3 تا 4 پلە دادەبەزن و لە کاتەکانی شەودا لە ناوچە شاخاوییەکان بۆ 0 پلەی سیلیزی سفری سەدی دادەبەزن.

ئەم سەرمایە تا کۆتایی ئەم هەفتەیە، ڕۆژی هەینی لە ناوچەکەدا دەمێنێتەوە و کەشوهەواش جێگیر دەبێت، لە ڕۆژی شەممە 14ـەی مانگەوە، بەهۆی دروستبوونی بەرزەپاڵەپەستۆیەک لە ناوچەکەدا، پلەکانی گەرما کەمێک بەرز دەبنەوە.

پێشبینی دەکرێت ئەم سەقامگیرییەی کەشوهەوا تاوەکو 20ـی مانگ بەردەوام بێت و پاش ئەو بەروارەش ئەگەری دەستپێکردنەوەی شەپۆلێکی نوێی بارانبارین لە ئارادایە.

AM:08:46:08/11/2026

ئه‌م بابه‌ته 492 جار خوێنراوه‌ته‌وه‌‌

لێرەوە کۆمێنت بنوسە لە فەیسبوک دەردەکەوێت